ಪುಸ್ತಕ ಓದುವುದರಿಂದ...

* ಜ್ಞಾನ, ವಿವೇಕ ಹೆಚ್ಚುತ್ತದೆ.
* ವಿನಯತೆ ಉಂಟಾಗುತ್ತದೆ.
* ವಿಷಯ ಪ್ರಭುತ್ವ  ಉಂಟಾಗುತ್ತದೆ.
* ಅಹಂಕಾರ ಅಳಿಯುತ್ತದೆ.
*ಉತ್ತಮ ಸಂಸ್ಕಾರ, ಸಂಸ್ಕೃತಿ ಬೆಳೆಯುತ್ತದೆ.
* ಮನಸ್ಸು ಪ್ರಬಲವಾಗುತ್ತದೆ.
* ಇಂದ್ರಿಯ ನಿಗ್ರಹ ಉಂಟಾಗುತ್ತದೆ.
* ಏಕಾಗ್ರತೆ, ನೆನಪಿನ ಶಕ್ತಿ ವೃದ್ಧಿಸುತ್ತದೆ.
* ಮನಸ್ಸು ಸದಾಕಾಲ ಶಾಂತವಾಗಿರುತ್ತದೆ.
* ಭಯ, ಉದ್ವೇಗ, ಒತ್ತಡ ಕಡಿಮೆಯಾಗುತ್ತದೆ.
* ಸಮಾಜದಲ್ಲಿ ವ್ಯಕ್ತಿ ಗೌರವಿಸಲ್ಪಡುತ್ತಾನೆ.
* ಸಚ್ಚಾರಿತ್ರ್ಯ ಉಂಟಾಗುತ್ತದೆ.
* ೬ನೇ ಇಂದ್ರಿಯ ಜಾಗೃತವಾಗುತ್ತದೆ.
* ಮುಖ ಲಕ್ಷಣ, ನಡಿಗೆ, ವರ್ತನೆ ಬದಲಾಗುತ್ತದೆ.
* ಒಳ್ಳೆಯ ಪುಸ್ತಕಗಳನ್ನು ಓದುವ, ಸಂಗ್ರಹಿಸುವ ಹವ್ಯಾಸ ಬೆಳೆಯುತ್ತದೆ.
* ಆತ್ಮವಿಶ್ವಾಸ ಹೆಚ್ಚುತ್ತದೆ.
* ಅಸಾಧ್ಯವಾದುದನ್ನು ಸಾಧಿಸುವ ಧೈರ್ಯ ಬರುತ್ತದೆ.
* ಆತ್ಮಗೌರವ ಉಂಟಾಗುತ್ತದೆ.
* ಪ್ರಚಲಿತ ವಿದ್ಯಮಾನಗಳನ್ನು ಅರಿಯುವದರ ಜೊತೆಗೆ ಚರ್ಚಿಸುವ, ವಿಶ್ಲೇಷಿಸುವ, ವಿಮರ್ಶಿಸುವ ಸಾಮರ್ಥ್ಯ ಬರುತ್ತದೆ.
* ಎಲ್ಲ ಬಗೆಯ ಸಮಸ್ಯೆಗಳನ್ನು ಪರಿಹರಿಸುವ ಸಾಮರ್ಥ್ಯ ಮೂಡುತ್ತದೆ.
* ಸಹನೆ, ಸೃಜನಶೀಲತೆ ಬೆಳೆಯುತ್ತದೆ.

        ಈ ಮೇಲಿನ ಎಲ್ಲವೂ ಪ್ರತಿಯೊಬ್ಬ ನಿರಂತರ ಓದುಗನಿಗೆ ದೊರೆಯುವ ಲಾಭಗಳು. ಬುದ್ಧಿ ತಿಳಿದಾಗಿನಿಂದ ಪುಸ್ತಕಗಳ ಸಂಗದಲ್ಲಿರುವ ನಾನು ಈ ಎಲ್ಲವುಗಳು ನನ್ನ ಅನುಭವಕ್ಕೆ ಬಂದ ಸಂಗತಿಗಳು. ಇಷ್ಟಾಗ್ಯೂ ಓದಿನಲ್ಲಿ ಪರಿಪೂರ್ಣವಾಗಿ ಮಗ್ನವಾಗುದಿದೆಯಲ್ಲ...ಅದು ನಿಜಕ್ಕೂ ಪರಮಾದ್ಭುತ, ಅನಂತ ಆನಂದವನ್ನೀಯುತ್ತದೆ. ಆದರೆ ಓದಿನಲ್ಲಿ ಆಳವಾಗಿ ಇಳಿದ ಮೇಲೆ ಮತ್ತೆ ಹೊರಗಿನ ಪ್ರಪಂಚಕ್ಕೆ ಸಿಲುಕಿಕೊಳ್ಳಬಾರದು. ಕೆಲವು ವರ್ಷ ಈ ರೀತಿ ಓದಿದರೂ ಸಾಕು; ಐಐಟಿ, ಕೆ.ಎ.ಎಸ್., ಐ.ಎ.ಎಸ್. ಪರೀಕ್ಷೆಗಳು ನೀರು ಕುಡಿದಷ್ಟೇ ಸಲೀಸಾಗಿ ತೆಕ್ಕೆಗೆ ಬಂದು ಬೀಳುತ್ತವೆ. ಏನಂತೀರಿ...?

ಕ್ರಿಕೆಟ್

ಚಿಕ್ಕಂದಿನಿಂದಲೇ ನನಗೆ ಕ್ರಿಕೆಟ್ ಒಲಿಯಲಿಲ್ಲ. ಆಡಬೇಕೆಂಬ ಆಸೆ ಇದ್ದರೂ ಸರಿಯಾದ ಇರಲಾರದಕ್ಕೆ ಸ್ನೇಹಿತರು ಕೂಡ ಆಟಕ್ಕೆ ಕರೆದುಕೊಳ್ಳುತ್ತಿರಲಿಲ್ಲ. ಆಗೆಲ್ಲ ಅವರ ಮೇಲೆ ತುಂಬ ಸಿಟ್ಟು ಬರುತ್ತಿತ್ತು. ಕ್ರಿಕೆಟ್ ಎಂಬುದು ಏಕವ್ಯಕ್ತಿಯ ಆಟ ಅಲ್ಲವಲ್ಲ. ಅದಕ್ಕಾಗಿ ಒಂಟಿಯಾಗಿ ಸುಮ್ಮನೆ ಕುಳಿತು ಆಟ ನೋಡುತ್ತಿದ್ದೆ. ಆದರೆ ಎದೆಯೊಳಗೆ ಒಂದು ಆಸೆ ಇತ್ತು. ಮುಂದೆ ಒಂದಲ್ಲ ಒಂದು ದಿನ ನಾನು groundಗೆ ಇಳಿದು ಕ್ರಿಕೆಟ್ ಆಡ್ತೀನಿ ಅಂತ. ಸ್ನೇಹಿತರ ಜೊತೆ ಆಡಬೇಕು ಅಂತ ಅಂದುಕೊಂಡಿದ್ದೆ, ಆದರೆ ಸಿಕ್ಕಿದ್ದು ನನ್ನ ವಿದ್ಯಾರ್ಥಿಗಳೆಂಬ ಸ್ನೇಹಿತರು. ನನ್ನ ವಿದ್ಯಾರ್ಥಿಗಳೊಂದಿಗೆ ಕ್ರಿಕೆಟ್ ಆಡುವಾಗ ಬಾಲ್ಯದ ನೆನಪುಗಳೆಲ್ಲ ಒತ್ತರಿಸಿ ಬಂದವು. ನನ್ನ ವಿದ್ಯಾರ್ಥಿಯೊಬ್ಬ ನಾ ಆಡುವ ದೃಶ್ಯವನ್ನು ಸೆರೆಹಿಡಿದು ನನಗೆ ಕೊಟ್ಟ. ಬಾಲ್ಯದ ಆಸೆಯೊಂದು ಈಗ ನನಸಾಯಿತು.  ಸುಮ್ಮನೆ ನಿಮ್ಮೊಂದಿಗೆ  ಹಂಚಿಕೊಳ್ಳಬೇಕು ಅನಿಸ್ತು. ಅದಕ್ಕೆ ಈ ವಿಡಿಯೋ...

ಅಪ್ರತಿಮ ಗಣಿತಜ್ಞ - ಪಾಲ್ ಏರ್ಡಿಶ್

    ಆಂಡ್ರ್ಯೂ ವಸೋನಿ, ತನ್ನ ಹದಿನಾಲ್ಕನೇ ಎಳವೆಯಲ್ಲೇ ದೊಡ್ಡ ದೊಡ್ಡ ಗಣಿತ ಸಮಸ್ಯೆಗಳನ್ನು ಲೀಲಾಜಾಲವಾಗಿ ಬಿಡಿಸಿ ಸುತ್ತ ನೆರೆದಿದ್ದ ಗೆಳೆಯರನ್ನು ತಬ್ಬಿಬ್ಬುಗೊಳಿಸುತ್ತಿದ್ದ ಕಾಲ. ಅವನ ತಂದೆಗೂ ತನ್ನ ಮಗ ಮಹಾಮೇಧಾವಿ. ದೊಡ್ಡ ಹೆಸರನ್ನು ಮಾಡುತ್ತಾನೆ ಎಂದು ಪೂರ್ತಿ ನಂಬಿಕೆ ಬಂದು ಬಿಟ್ಟಿತ್ತು. ಆತ ಅದೇ ಊರಲ್ಲಿದ್ದ ಇನ್ನೊಬ್ಬ ಹೆಸರುವಾಸಿ ಹುಡುಗನನ್ನು ತನ್ನ ಮಗನಿಗೆ ಪರಿಚಯ ಮಾಡಿಸಬೇಕೆಂದುಕೊಂಡ. ಪಂಡಿತ ಮೆದುಳಿನ ಇಬ್ಬರು ಹುಡುಗರ ಪರಸ್ಪರ ಕುಶಲೋಪರಿಗೆ ವೇದಿಕೆ ಸಿದ್ಧವಾಯಿತು. ಒಂದು ದಿನ ಆ ಇನ್ನೊಬ್ಬ ಹುಡುಗ, ವಸೋನಿಯ ಅಪ್ಪನ ಚಪ್ಪಲಂಗಡಿಗೆ ಬಂದು ವಸೋನಿಯನ್ನು ಭೇಟಿಯಾದ.
"ಯಾವುದಾದರೂ ನಾಲ್ಕು ಅಂಕಿಗಳಿರುವ ಸಂಖ್ಯೆ ಹೇಳು" - ಬಂದು ಕೂತವನ ಪ್ರಶ್ನೆ.
"೨೫೩೨" - ವಸೋನಿಯ ಉತ್ತರ.
"ಸರಿ, ಅದರ ವರ್ಗ ೬೪೧೧೦೨೪. ಕ್ಷಮಿಸು. ಅದರ ಘನವನ್ನು ಈಗ ಕ್ಷಣಾರ್ಧದಲ್ಲಿ ಹೇಳಲು ಆಗ್ತಾ ಇಲ್ಲ. ವಯಸ್ಸಾಯ್ತಲ್ವೇ! ಇರಲಿ, ಪೈಥಾಗೋರಸನ ಪ್ರಮೇಯಕ್ಕೆ ಇರುವ ಸಾಧನೆಗಳಲ್ಲಿ ಎಷ್ಟು ಗೊತ್ತು ನಿನಗೆ?" ಅತಿಥಿಯ ಮರುಪ್ರಶ್ನೆ.
ವಸೋನಿ "ಒಂದು" ಎಂದು ಹೇಳುವ ಮೊದಲೇ ಆ ಹುಡುಗ, "ನನಗೆ ಮೂವತ್ತೇಳು ಸಾಧನೆಗಳು ಗೊತ್ತು!" ಅಂತ ಹೇಳಿ ಮುಂದಿನ ಪ್ರಶ್ನೆಗೆ ಹಾರಿದ. ಅದಕ್ಕೂ ವಸೋನಿ ಪೆದ್ದುಪೆದ್ದಾಗಿ ಉತ್ತರ ಗೊತ್ತಿಲ್ಲ ಎಂದು ಗೋಣು ಅಲ್ಲಾಡಿಸಿದಾಗ, ಆ ಹುಡುಗ ಉನ್ನತ ಸ್ತರದ ಗಣಿತವನ್ನೊಳಗೊಂಡ ಒಂದು ಪ್ರಮೇಯವನ್ನು ಹಂತಹಂತವಾಗಿ ಬಿಡಿಸಿ ಅದರ ಅರ್ಥ ಹೇಳಿ ವಿವರವಾಗಿ ಕಲಿಸಿದ. "ಸರಿ, ನಾನೀಗ ಓಡ್ಬೇಕು" ಅಂತ ಹೇಳಿ ಮುಂದೆ ಕ್ಷಣಮಾತ್ರವೂ ಅಲ್ಲಿ ನಿಲ್ಲದೆ ಅಂಗಡಿಯಿಂದ ಹೊರಗೋಡಿ ಕಣ್ಮರೆಯಾದ!

          ಇಷ್ಟು ದಿನ, ಜಗತ್ತಿನ ಸರ್ವಶ್ರೇಷ್ಟ ವಿದ್ವಾಂಸನಾಗುತ್ತೇನೆ ಅಂತ ಆಗಾಗ ಕೋಡು ಮೂಡಿತೇ ಎಂದು ಪರೀಕ್ಷಿಸಿಕೊಂಡು ಬೀಗುತ್ತಿದ್ದ ವಸೋನಿಗೆ ಹೊಂಡ ತೋಡಿ ಹೂತುಕೊಳ್ಳುವಷ್ಟು ಆಘಾತವಾಗಿತ್ತು! ಆ  ಹುಡುಗನೆದುರಲ್ಲಿ ತನ್ನ ಪಾಂಡಿತ್ಯ ಗುಲಗಂಜಿಯಷ್ಟು ಇಲ್ಲವಲ್ಲ ಅಂತ ನಾಚಿಕೆ, ಸಿಟ್ಟು ಒತ್ತೊತ್ತಿ ಬಂದವು. ಗಣಿತದ ಮಹಾಪಂಡಿತನಾಗಿ ಜಗತ್ತು ಗೆಲ್ಲುತ್ತೇನೆ ಅಂತ ಶಪಥ ಹಾಕಿದ್ದ ವಸೋನಿಯನ್ನು ಹೆಡೆಮುರಿ ಕಟ್ಟಿ ಕೂರ್‍ಇಸಿದ್ದ `ಆ ಹುಡುಗ' - ನಮ್ಮನಿಮ್ಮಂತಹ ಜನಸಾಮಾನ್ಯರಿಗೆ ಮಾತ್ರವಲ್ಲ ಕಾಲೇಜಿನಲ್ಲಿ ಗಣಿತ-ವಿಜ್ಞಾನಗಳನ್ನು ಕಲಿಯುವ, ಕಲಿಸುವವರಿಗೂ ತಕ್ಕಷ್ಟು ಪರಿಚಯವಿಲ್ಲದ ಅಜ್ಞಾತ ಪಂಡಿತೋತ್ತಮ - ಪಾಲ್ ಏರ್ಡಿಶ್

        ಎಳವೆಯಲ್ಲೇ ಎವರೆಸ್ಟ್ ಶಿಖರ

            ಮೂರು ವರ್ಷದ ಬಾಲಕನಿದ್ದಾಗ ಏರ್ಡಿಶ್‍ಗೆ ದಿನರಾತ್ರಿ ಸಂಖ್ಯೆಗಳದ್ದೇ ಧ್ಯಾನ. ಯಾರಾದರೂ ತುಂಟ ಮರೀ ಎಂದು ಎತ್ತಿಕೊಂಡು ಮುದ್ದುಮಾಡಿದರೆ ಏರ್ಡಿಶ್ ಹೇಳುತ್ತಿದ್ದುದ್ದು - "ನಿಮ್ಮ ವಯಸ್ಸು ಹೇಳಿ, ಇದುವರೆಗೆ ಎಷ್ಟು ಸೆಕೆಂಡುಗಳ ಕಾಲ ಬದುಕಿದ್ದೀರೆಂದು ಹೇಳುತ್ತೇನೆ!" ನಾಲ್ಕು ವರ್ಷದವನಿದ್ದಾಗ ಏರ್ಡಿಶ್‍ಗೆ ಒಂದು ದಿನ ಥಟ್ಟನೇ ಜ್ಞಾನೋದಯವಾಯಿತು. ಕೂಡಲೇ ಅಮ್ಮನ ಬಳಿ ಓಡಿಹೋಗಿ "ನೂರರಿಂದ ಇನ್ನೂರೈವತ್ತು ತೆಗೆದರೆ ಏನು ಉಳಿಯುತ್ತೆ ಗೊತ್ತೆ? ಸೊನ್ನೆಯ ಕೆಳಗೆ ನೂರೈವತ್ತು!" ಎಂದು ಹೇಳಿ ವಿಸ್ಮಯ ಮೂಡಿಸಿದ. ಇಡೀ ಹಂಗೇರಿ ದೇಶದ ಚರಿತ್ರೆಯಲ್ಲೇ ಅತ್ಯಂತ ಚಿಕ್ಕ ವಯಸ್ಸಿಗೆ ಪಿಎಚ್‍ಡಿ ಮುಗಿಸಿದವನು ಎಂಬ ಕೀರ್ತಿಗೆ ಪಾತ್ರನಾದವನು ಈ ಏರ್ಡಿಶ್. ಆ ಯಾದಿಯಲ್ಲಿ ಎರಡನೆಯವನಾಗಿ ಬಂದವನು ಏರ್ಡಿಶ್‍ನ ಗೆಳೆಯ, ಒಂದಾನೊಂದು ಕಾಲದಲ್ಲಿ ಏರ್ಡಿಶ್‍ನ ಬುದ್ಧಿಮತ್ತೆಗೆ ಬೆರಗಾಗಿ ಹೊಟ್ಟೆಕಿಚ್ಚುಪಟ್ಟಿದ್ದ ಅದೇ ಆಂಡ್ರ್ಯೂ ವಸೋನಿ.

             ಏರ್ಡಿಶ್ ಬದುಕಿನಲ್ಲಿ ವೈರುಧ್ಯಗಳು, ವಿರೋಧಾಭಾಸಗಳಿಗೆ ಜಾಗವೇ ಇರಲಿಲ್ಲ. "ನಾನೀಗ ಓಡಬೇಕು" ಅಂತ ಅವನು ಹೇಳಿದನೆಂದರೆ ಮುಂದಿನ ಕ್ಷಣದಲ್ಲೇ ಓಡುತ್ತಿರುವ ಏರ್ಡಿಶ್‍ನನ್ನು ನೋಡಬಹುದಾಗಿತ್ತು. ಮಿಕ್ಕ ಗೆಳೆಯರು ಹುಡುಗಿಯರನ್ನು ನೋಡಲು ಚಾನ್ಸ್ ಸಿಗುತ್ತದೆ ಎಂಬ ಕಳ್ಳಬಯಕೆಗಳನ್ನಿಟ್ಟುಕೊಂಡು ಸ್ಕೇಟಿಂಗ್ ಮಾಡಲು ಹೋಗುತ್ತಿದ್ದರೆ, ಏರ್ಡಿಶ್ ಸ್ಕೇಟಿಂಗ್ ಮಾಡುತ್ತಿದ್ದದ್ದು ಅದು ತನಗೆ ಇಷ್ಟ ಎನ್ನುವ ಕಾರಣಕ್ಕೆ. ಯಾರಾದರೂ ಎದುರು ಸಿಕ್ಕಿ "ಹೇಗಿದ್ದೀಯ ಏರ್ಡಿಶ್?" ಅಂತ ಕುಶಲ ಕೇಳಿದರೆ ಈ ಆಸಾಮಿ, ತಾನು ಹೇಗಿದ್ದೇನೆ ಅಂತ ವಿವರವಾಗಿ ಹೇಳುವುದಕ್ಕೆ ನಿಂತುಬಿಡುತ್ತಿದ್ದ!

         ಅವನಿಗೆ ಗಣಿತ - ಬೇರೆಯವರೆದುರು ಗತ್ತಿನಿಂದ ಬೀಗಲು ಬೇಕಾದ ಸಾಧನವಾಗಿರಲಿಲ್ಲ. ಗಣಿತ ಅವನ ಜೀವನವನ್ನು ನಿಜವಾಗಿಯೂ ಹಬ್ಬಿ ಬೆಳೆದು ಅಪೋಶನ ತೆಗೆದುಕೊಂಡುಬಿಟ್ಟಿತ್ತು. ಮೊದಮೊದಲು ಹೊಟ್ಟೆಕಿಚ್ಚುಪಟ್ಟರೂ ಬಳಿಕ ಏರ್ಡಿಶ್‍ನ ನೆಚ್ಚಿನ ಗೆಳೆಯನಾದ ವಸೋನಿಯ್ಗೆ "ಗಣಿತಜ್ಞನಾಗಿ ಜೀವಮಾನವಿಡೀ ಗಣಿತವನ್ನೇ ಉಸಿರಾಡುತ್ತ ಬದುಕಲೇ ಅಥವಾ ತಾಂತ್ರಿಕ ವಿದ್ಯಾಭ್ಯಾಸಕ್ಕೆ ಸೇರಿ ಇಂಜಿನಿಯರಾಗಿ ಚೆನ್ನಾಗಿ ದುಡ್ದು ಮಾಡಲೇ" ಎಂಬ ಜೀವನ್ಮರಣದ ಜಿಜ್ಞಾಸಕ್ಕೆ ಬಂದಾಗ ಏರ್ಡಿಶ್ "ನೀನು ಇಂಜಿನಿಯರಿಂಗ್ ಕಾಲೇಜಿಗೆ ಹೋಗು. ಅಲ್ಲಿ ಗೇಟ್ ಪಕ್ಕದಲ್ಲಿ ಗನ್ ಹಿಡಿದು ಕಾಯುತ್ತೇನೆ. ನೀನು ಬರುತ್ತಲೇ ಶೂಟ್ ಮಾಡಿ ಕತೆ  ಮುಗಿಸುತ್ತೇನೆ." ಎಂದು ಪರಿಹಾರ ಹೇಳಿದ ಮೇಲೆ, ಬೆಟ್ಟದಂತಹ ಸಮಸ್ಯೆ ನೀರಿನಂತೆ ಕರಗಿಹೋಯಿತು!

            ಯುರೋಪಿನ ಭೂಪಟದಲ್ಲಿ ಅಕ್ಕಿಕಾಳಷ್ಟೂ ದೊಡ್ಡದಲ್ಲದ ಹಂಗೇರಿ ಎಂಬ ದೇಶ ಗಣಿತ ಕ್ಷೇತ್ರದಲ್ಲಿ ದಾಪುಗಾಲು ಹಾಕುತ್ತ ಗಜನಡಿಗೆ ಮಾಡುತ್ತಿದ್ದ ಸಮಯ ಅದು. ಜಗತ್ತು ಕಂಡ ಮಹಾಮೇಧಾವಿ ಗಣಿತಜ್ಞರೆಲ್ಲ ಹೊರಬರುತ್ತಿದ್ದದ್ದು ಈ ಪುಟ್ಟ ಕಾರ್ಖಾನೆಯಿಂದಲೇ. ಏರ್ಡಿಶ್ ಹುಟ್ಟಿದ್ದು ೧೯೧೩ರ ಮಾರ್ಚ್ ೨೬ರಂದು, ಹಂಗೆರಿಯ ರಾಜಧಾನಿ ಬುಡಾಪೆಸ್ಟಿನಲ್ಲಿ. ಮೂರು ಮತ್ತು ಐದು ವರ್ಷದ ಅಕ್ಕಂದಿರು ಏರ್ಡಿಶ್ ಹುಟ್ಟುವ ಹೊತ್ತಿಗೆ ಸ್ಕಾರ್ಲೆಟ್ ಜ್ವರ ಬಂದು ತೀರಿಕೊಂಡರು. ಇನ್ನು ಬದುಕುಳಿದ ಒಂದು ಮಗುವನ್ನಾದರೂ ನಿರೋಗಿಯಾಗಿ ಬೆಳೆಸಬೇಕೆಂದು ತಾಯಿ ಅನ್ನಾ ಪಟ್ಟ ಪಡಿಪಾಟಲು ಅಪಾರ. ಅಪ್ಪ ಲಾಜೋ ಏರ್ಡಿಶ್ ಮೊದಲ ಮಹಾಯುದ್ಧದ ಸಮಯದಲ್ಲಿ ಸೈನ್ಯ ಸೇರಿ ದೇಶಕ್ಕಾಗಿ ಹೋರಾಡಲು ಹೋಗಿ ರಷ್ಯನ್ನರ ಕೈಗೆ ಸಿಕ್ಕಿ ಸೈಬೇರಿಯ ಜೈಲಿನಲ್ಲಿ ಚಳಿಗಾಳಿಯಲ್ಲಿ ನಲುಗಿ ಮರಳಿ ಹಂಗೆರಿಗೆ ಬಂದಾಗ ಜೀವಚ್ಚವವಾಗಿಬಿಟ್ಟಿದ್ದ. ಗಣಿತ ಶಿಕ್ಷಕರಾಗಿದ್ದ ತಂದೆ ತಾಯಿಗಳಿಂದ ಏರ್ಡಿಶ್ ಅನುವಂಶಿಯವಾಗಿಯೇ ಗಣಿತಾಸಕ್ತಿ ಪಡೆದನೋ ಏನೋ. ಬಹಳ ಮುತುವರ್ಜಿ ವಹಿಸಿ ಸಾಕು ಸಲುಹಿದ ತಾಯಿಯೇ ಏರ್ಡಿಶ್‍ನ ಮೊದಲ ಗುರು.


ಹರಿಯತೊಡಗಿದ ಗಂಗೆ

     ತನಗಿಂತ ಚಿಕ್ಕದಾದ ಯಾವುದೇ ಸಂಖ್ಯೆಯಿಂದಲೂ (೧ನ್ನು ಹೊರತುಪಡಿಸಿ) ನಿಶ್ಯೇಷವಾಗಿ ಭಾಗವಾಗಿ ಹೋಗದ ಸ್ವಾಭಾವಿಕ ಸಂಖ್ಯೆಯನ್ನು ಪರಮ ಸಂಖ್ಯೆ (ಪ್ರೈಮ್ ನಂಬರ್) ಎಂದು ಕರೆಯುತ್ತಾರೆ. (ಅವಿಭಾಜ್ಯ ಸಂಖ್ಯೆ ಎಂಬ ಪಾರಂಪರಿಕ ನಾಮವನ್ನು ಕೈಬಿಟ್ಟು ಅದರ ಮಹತ್ವವನ್ನು ಧ್ವನಿಸುವ ಹೊಸ ಶಬ್ದ ಇದಾಗಿದೆ) ೧ಕ್ಕಿಂತ ದೊಡ್ಡದಾದ ಯಾವುದೇ ಒಂದು ಸ್ವಾಭಾವಿಕ ಸಂಖ್ಯೆ ಮತ್ತು ಅದರ ಎರಡುಪಟ್ಟು ಇರುವ ಇನ್ನೊಂದು ಸಂಖ್ಯೆಯನ್ನು ತೆಗೆದುಕೊಂಡಾಗ, ಆ ಎರಡು ಸಂಖ್ಯೆಗಳ ನಡುವೆ ಒಂದಾದರೂ ಪರಮಸಂಖ್ಯೆ ಇದ್ದೇ ಇರುತ್ತದೆ ಎನ್ನುವದು ಚೆಬಿಶೆಫ್ ಎಂಬುವನು ವ್ಯಕ್ತಪಡಿಸಿದ ಗಣಿತಾನುಮಾನ. (ಗಣಿತಾನುಮಾನ ಎಂದರೆ ಸಾಧನೆಯ ಸಿದ್ಧಿ ದೊರೆತು `ಪ್ರಮೇಯ'ವೆಂಬ ಮೋಕ್ಷವನ್ನು ಇನ್ನೂ ಪಡೆಯದೆ ಅಲೆಯುವ ಅತೃಪ್ತ ಆತ್ಮ!) ಏರ್ಡಿಶ್ ಬುಡಾಪೆಸ್ಟಿನ ಸಾಯನ್ಸ್ ಯೂನಿವರ್ಸಿಟಿಯಲ್ಲಿ ವ್ಯಾಸಂಗ ಮಾಡುತ್ತಿದ್ದಾಗ, ಈ ಅನುಮಾನಕ್ಕೆ ಸಾಧನೆಯ ಕಿರೀಟ ತೊಡಿಸಿ, ಹಲವಾರು ವರ್ಷಗಳ ಕಾಲ ಉತ್ತರವಿಲ್ಲದೆ ನಿಂತಿದ್ದ ಸಮಸ್ಯೆಗೆ ಮುಕ್ತಿ ಕರುಣಿಸಿದ. ಏರ್ಡಿಶ್ ಬರೆದ ಸಾಧನೆಯನ್ನು ಅರ್ಥಮಾಡಿಕೊಳ್ಳಲು ವಿಶ್ವವಿದ್ಯಾಲಯದ ಪ್ರೊಫೆಸರುಗಳು ರಜೆ ತೆಗೆದುಕೊಂಡು ದಿನವಿಡೀ ಕೂತು ಓದಿಓದಿ ತಲೆಕೆರೆದುಕೊಳ್ಳಬೇಕಾಯಿತು! ಜಗತ್ತಿನ ದೊಡ್ದದೊಡ್ಡ ಗಣಿತಜ್ಞರಿಗೆ ತಲೆನೋವಾಗಿದ್ದ ಸಮಸ್ಯೆಯನ್ನು ಲೀಲಾಜಾಲವಾಗಿ ಹಲಸಿನಹಣ್ಣು ಬಿಡಿಸಿಟ್ಟಂತೆ ಬಿಡಿಸಿ ಪರಿಹರಿಸಿದ ಹದಿನಾರರ ಹುಡುಗ ಇಪ್ಪತ್ತು ತುಂಬುವ ಮೊದಲೇ ಡಾಕ್ಟರೇಟ್ ಪಡೆದು ಹೊರಗೆ ಬಂದ!
            ಏರ್ಡಿಶ್ ಜೀವನದಲ್ಲಿ ಗಣಿತ ಬಿಟ್ಟರ ಬೇರೆ ಏನೂ ಬೇಕಾಗಿರಲಿಲ್ಲ. ತಾನು ಇಪ್ಪತ್ತೈದೋ ಇಪ್ಪಾತ್ತಾರೋ ಇದ್ದಾಗ ನೋಡಿದ ಒಂದು ಸಿನಿಮಾ ಬಿಟ್ಟರೆ ಏರ್ಡಿಶ್ ಎಂದೂ ಸಿನಿಮಾ ನೋಡಲೇ ಇಲ್ಲ. ನಾಟಕಗಳಿಗೆ ಹೋಗಲಿಲ್ಲ. ಕತೆ, ಕಾದಂಬರಿಗಳನ್ನು ಕಣ್ಣೆತ್ತಿ ಕೂಡ ನೋಡುವ ಆಸಕ್ತಿ ತೋರಿಸಲಿಲ್ಲ. ಅಷ್ಟೆಲ್ಲ ಯಾಕೆ, ಒಂದು ವಾರ ಮನೆಯಲ್ಲೇ ನ್ಮಲಗಿ ರೆಸ್ಟ್ ತೆಗೆದುಕೊಳ್ಲಬೇಕಾಗುತ್ತದೆ ಎಂಬ ಕಾರಣಕ್ಕೆ ಇಳಿವಯಸ್ಸಿನಲ್ಲಿ ಕಣ್ಣಿನ ಕ್ಯಾಟರಾಕ್ಟ್ ಆಪರೇಷನ್ ಕೂಡ ಮಾಡಿಸಿಕೊಳ್ಳದೇ ಮೊಂಡು ಹಟ ಹಿಡಿದುಬಿಟ್ಟಿದ್ದರು. ಕೂತಲ್ಲಿ ನಿಂತಲ್ಲಿ ಗಣಿತವನ್ನೇ ಧೇನಿಸುತ್ತಿದ್ದ ಈ ಪಂಡಿತನಿಗೆ ಜೀವನದಲ್ಲಿ ಒಮ್ಮೆಯೂ ಹೆಂಡತಿಯ ಸಾಂಗತ್ಯ ಬೇಕು ಅಂತ ಕೂಡ ಅನಿಸಲಿಲ್ಲವಲ್ಲ ಅಂತ ಏರ್ಡಿಶ್‍ ಗೆಳೆಯರಿಗೆ ಆಶ್ಚರ್ಯ.

                ೧೯೩೮ರಲ್ಲಿ ಹಂಗೆರಿಯಲ್ಲಿ ಎರಡನೆ ಮಹಾಯುದ್ಧದ ಬಿಸಿ ಏರುತ್ತ ಹೋದ ಹಾಗೆ, ಏರ್ಡಿಶ್ ತನ್ನ ಓರಗೆಯ ಗೆಳೆಯರು ಮಾಡಿದಂತೆಯೇ ಗಂಟುಮೂಟೆ ಕಟ್ಟಿಕೊಂಡು ಪಲಾಯನ ಮಾಡಿ ಬೇರೆ ದೇಶಗಳಲ್ಲಿ ಆಶ್ರಯ ಪಡೆಯಬೇಕಾಗಿತ್ತು. ಈ ಅವಕಾಶ ಕಳೆದುಕೊಳ್ಳಲು ಬಯಸದ ಅಮೆರಿಕದ ಪ್ರಿನ್ಸ್‍ಟನ್ನಿನ ಉನ್ನತ ಅಧ್ಯಯನ ಸಂಸ್ಥೆ ಏರ್ಡಿಶ್‍ಗೆ ಮುಕ್ತ ಆಹ್ವಾನ ನೀಡಿತು. ಅಮೆರಿಕೆಗೆ ಹೋದ ಏರ್ಡಿಶ್ ಅಲ್ಲಿ ಒಂದೂವರೆ ವರ್ಷ ಇದ್ದು ಎಷ್ಟು ಸಾಧ್ಯವೋ ಅಷ್ಟು ವಿಶ್ವವಿದ್ಯಾಲಯಗಳಿಗೆ ಭೇಟಿಕೊಟ್ಟು, ಅಲ್ಲಿ ನಡೆಯುತ್ತಿದ್ದ ಗಣಿತ ವಿಚಾರ ಸಂಕಿರಣಗಳಿಗೆ ಹಾಜರಿ ಹಾಕಿ ಅಲ್ಲಿನ ಉತ್ತಮ ಗಣಿತಜ್ಞರ ಜೊತೆ ಗಹನವಾದ ಚರ್ಚೆ-ಸಂವಾದ ನಡೆಸುತ್ತ ಉನ್ನತ ಸ್ತರದ ಸಂಶೋಧನ ಲೇಖನಗಳನ್ನು ಬರೆಯಲು ತೊಡಗಿದರು.


ಸ್ಥಾವರಕ್ಕಳಿವುಂಟು, ಜಂಗಮಕ್ಕಳಿವಿಲ್ಲ!

            ೧೯೫೪ - ಏರ್ಡಿಶ್ ಜೀವನದಲ್ಲಿ ಬಹಳ ಮಹತ್ವದ ವರ್ಷ. ಆ ವರ್ಷ ಅವರಿಗೆ ನೆದರ್‌ಲ್ಯಾಂಡಿನ ಆಮ್‍ಸ್ಟರ್‌ಡ್ಯಾಮಿನಲ್ಲಿ ನಡೆಯಲಿದ್ದ ಒಂದು ಅಂತಾರಾಷ್ಟ್ರೀಯ ಗಣಿತ ಸಮ್ಮೇಳನದಲ್ಲಿ ಭಾಗವಹಿಸಲು ಕರೆ ಬಂದಿತು. ವೀಸಾ-ಪಾಸ್‍ಪೋರ್ಟುಗಳ ಕೆಲಸ ಮುಗಿಸಲು ಪಾಸ್‍ಪೋರ್ಟ್ ಆಫೀಸನ್ನು ಸಂಪರ್ಕಿಸಿದ ಏರ್ಡಿಶ್‍ಗೆ ಆಘಾತ ಕಾದಿತ್ತು. ಅಮೆರಿಕದ ವೀಸಾ ಅವಧಿಯನ್ನು ವಿಸ್ತರಿಸಲು ಒಪ್ಪದ ಇಮಿಗ್ರೇಶನ್ ಅಧಿಕಾರಿಗಳು, ಆಮ್‍ಸ್ಟರ್‌ಡ್ಯಾಮಿಗೆ ಹೋದರೆ ಮತ್ತೆ ಅಮೆರಿಕಕ್ಕೆ ಮರಳಲು ಬಿಡುವುದಿಲ್ಲ ಎಂದು ಹಟ ಹಿಡಿದು ಸುಖಾಸುಮ್ಮನೆ ಸತಾಯಿಸತೊಡಗಿದರು. ಏರ್ಡಿಶ್ ಮುಂದೆ ಇದ್ದ ಆಯ್ಕೆಗಳು ಎರಡೇ - ಅಮೆರಿಕದ ಮಾತಿಗೆ ತಲೆಬಾಗಿ ನಾತ್ರೆ ದಾಮಿನ ತನ್ನ ಕೆಲಸ ಮತ್ತು ಗ್ರೀನಕಾರ್ಡನ್ನು ಉಳಿಸಿಕೊಂಡು ಸುಮ್ಮನಿದ್ದುಬಿಡುವುದು ಅಥವಾ ಅಮೆರಿಕವನ್ನು ಧಿಕ್ಕರಿಸಿ ಆಮ್‍ಸ್ಟರ್‌ಡ್ಯಾಮಿಗೆ ಹೋಗುವುದು. ನನ್ನ ತಿರುಗಾಟದ ಪ್ರವೃತ್ತಿಯನ್ನು ಕಸಿದುಕೊಳ್ಳಲು ಈ ಅಂಕಲ್ ಸ್ಯಾಮ್ (ಅಮೆರಿಕವನ್ನು ಅಂಕಲ್ ಸ್ಯಾಮ್ ಎಂದು ಕರೆಯುತ್ತಾರೆ) ಯಾರು ಎಂದು ಏರ್ಡಿಶ್ ಅಮೆರಿಕದ ಧಿಮಾಕಿಗೆ ತಿರುಗೇಟು ಕೊಡುವಂತೆ ಆ ದೇಶವನ್ನು ಅದು ಕೊಟ್ಟ ಎಲ್ಲ ಪದವಿ-ಸ್ಥಾನಮಾನಗಳ ಜೊತೆ ಬೈರಾಗಿಯಂತೆ ತ್ಯಜಿಸಿ, ಗಣಿತ ಸಮ್ಮೇಳನಕ್ಕೆ ಹೊರಟರು. ಮತ್ತೆ ಅಮೆರಿಕ ಬಂದು ಕಾಲು ಹಿಡಿಯುವವರೆಗೆ ಆ ದೇಶದ ಮರ್ಜಿ ಹಿಡಿದು ಅಡಿಯಾಳಾಗಿ ಬದುಕುವುದಿಲ್ಲ ಎಂದು ಸೆಡ್ಡುಹೊಡೆದು ಹೇಳಿದರು.

                ತಾಯ್ನಾಡು ಹಂಗೆರಿಯಿಂದ ದೂರವಾಗಿ, ಯಾವೊಂದು ದೇಶದಲ್ಲೂ ನೆಲೆನಿಲ್ಲದೆ ಪರಿವ್ರಾಜಕನಂತೆ ದೇಶದಿಂದ ದೇಶಕ್ಕೆ ತಿರುಗುವ ಸಂತನ ಬದುಕು ಅಲ್ಲಿಂದ ಶುರುವಾಯಿತು. ಕುವೆಂಪು ಹೇಳಿದ "ಮನೆಯನೆಂದೂ ಕಟ್ಟದಿರು ಕೊನೆಯನೆಂದೂ ಮುಟ್ಟದಿರು" ಅನ್ನುವ ಅನಿಕೇತನ ತತ್ವಕ್ಕೆ ನೂರಕ್ಕೆ ನೂರು ಹೊಂದಿಕೆಯಾಗುವ ಮನುಷ್ಯ. ಈ ಜಗತ್ತಿನಲ್ಲಿ ಬಾಳಿಹೋಗಿದ್ದರೆ ಅದು ಏರ್ಡಿಶ್. ತನ್ನ ನಲವತ್ತನೆ ವಯಸ್ಸಿನಲ್ಲಿ ಹೀಗೆ ಕಾಲಿಗೆ ಚಕ್ರ ಕಟ್ಟಿಕೊಂಡಂತೆ ಲೋಕಸಂಚಾರ ಮಾಡಲು ತೊಡಗಿದ ಏರ್ಡಿಶ್ ಅಖಂಡ ನಲವತ್ತೈದು ವರ್ಷ ಎಲ್ಲೂ ನಿಲ್ಲದೆ ತಿರುಗಿದರು. ಒಂದು ವಿಶ್ವವಿದ್ಯಾಲಯದಿಂದ ಇನ್ನೊಂದಕ್ಕೆ, ಒಂದು ಗಣಿತ ಸಂಕಿರಣದಿಂದ ಮತ್ತೊಂದಕ್ಕೆ ಎನ್ನುತ್ತಾ ತಿರುಗಿದ ಈ ಯೋಗಿಗೆ ತನ್ನ ಉಳಿದ ಜೀವನ ಪೂರ್ತಿ ಒಂದು ನಿರ್ದಿಷ್ಟವಾದ ಮನೆಯಾಗಲೀ ಅಡ್ರೆಸ್ ಆಗಲೀ ಇರಲಿಲ್ಲ. "ನಿಮಗೆ ಏರ್ಡಿಶ್ ಅವರನ್ನು  ಭೇಟಿಯಾಗಬೇಕೆ? ನೀವೆಲ್ಲಿದ್ದೀರೋ ಅಲ್ಲೇ ಇದ್ದು ಕಾಯಿರಿ. ಒಂದಲ್ಲ ಒಂದು ದಿನ ಆ ಮನುಷ್ಯ ನೀವಿರುವ ಊರನ್ನು ಹಾದುಹೋಗುತ್ತಾರೆ". ಎಂಬ ಮಾತು ಗಣಿತಪ್ರಪಂಚದಲ್ಲಿ ಪ್ರಸಿದ್ಧವಾಗಿತ್ತು!

        ಏರ್ಡಿಶ್ ತನ್ನ ಜೊತೆ ಒಯ್ಯುತ್ತಿದ್ದು ಎರಡೇ ಎರಡು ಬ್ಯಾಗುಗಳನ್ನು. ಅವೆರಡೂ ಎಂದಿಗೂ ತುಂಬುತ್ತಿರಲಿಲ್ಲ. ಎರಡೂ ಸದಾಕಾಲವೂ ಅರ್ಧ ತುಂಬಿ ಅರ್ಧ ಖಾಲಿ ಇರುತ್ತಿದ್ದವು. ಯಾರಾದರೂ "ಅಲ್ಲಾ ಏರ್ಡಿಶ್ ಅವರೆ, ಹೀಗೆ ಎರಡು ಅರ್ಧ ಬ್ಯಾಗುಗಳನ್ನು ಹೊತ್ತುಕೊಂಡು ತಿರುಗುವುದಕ್ಕಿಂತ ಒಂದು ತುಂಬಿದ ಬ್ಯಾಗು ಇಟ್ಟುಕೋಬಹುದಲ್ಲ!" ಎಂದರೆ, ಕೇಳಿದವರಷ್ಟೇ ಆಶ್ಚರ್ಯಪಡುವ ಸರದಿ ಏರ್ಡಿಶ್‍ರದೂ ಆಗುತ್ತಿತ್ತು. "ಹೌದಲ್ಲ! ಅಂತ ತನಗೆ ತಾನೇ ಹೇಳಿಕೊಂದು ನಗುತ್ತಿದ್ದರು. ಆದರೆ ಮತ್ತೆ ವಿದೇಶ ಪ್ರಯಾಣಕ್ಕೆ ನಿಂತಾಗ ಅವರ ಕೈಯಲ್ಲಿ ಅದು ಹೇಗೋ ಆ ಎರಡು ಬ್ಯಾಗುಗಳೂ ಬಂದು ಕೂರುತ್ತಿದ್ದವು!


ಟಾರ್ಚರರೋ, ಟಾರ್ಚಲೈಟೋ ?

        ತಾನು ಯಾವುದೇ ಊರಿಗೆ ಹೋಗಲಿ, ಅಲ್ಲಿ ಇಳಿದ ಕೂಡಲೇ ಅಲ್ಲಿದ್ದ ಗಣಿತಜ್ಞರ ಮನೆಗೆ ಹೋಗಿ "ನನ್ನ ತಲೆ ತೆರೆದಿದೆ" ಎಂದು ಘಂಟಾಘೋಷವಾಗಿ ಸಾರುತ್ತಿದ್ದರು ಏರ್ಡಿಶ್. ಅದರರ್ಥ - ಇನ್ನೆರಡು ಮೂರು ದಿನ ನಾನಿಲ್ಲೇ ಇರುತ್ತೇನೆ. ಹಗಲೂ ರಾತ್ರಿ ಕೂತುಕೊಂಡು ಗಣಿತ ಸಮಸ್ಯೆಗಳನ್ನು ಬಿಡಿಸೋಣ - ಎಂದು! ಹಗಲುರಾತ್ರಿ ಎಂದರೆ ನಿಜವಾಗಿಯೂ ಹಗಲುರಾತ್ರಿಗಳೇ! ದಿನದ ಇಪ್ಪತ್ತು ತಾಸು ಕೂತು ನಿಂತು ನಡೆದಾಡಿಕೊಂಡು ಗಣಿತದ ಸಮಸ್ಯೆಗಳನ್ನು ಬಿಡಿಸುತ್ತ ಕಾಲಕಳೆಯುವ ಅದ್ಭುತ ಸಾಮರ್ಥ್ಯ ಅದುಹೇಗೋ ಏರ್ಡಿಶ್‍ಗೆ ಬಂದುಬಿಟ್ಟಿತ್ತು. ನಿದ್ದೆಗೆಟ್ಟು ಊದಿಕೊಂಡ ಕಣ್ಣುಗುಡ್ದೆಗಳನ್ನು ಹೊರಹಾಕಿಕೊಂಡು ಏರ್ಡಿಶ್‍ರ ಚಿಂತನೆಯ ವೇಗಕ್ಕೆ ಸಮನಾಗಿ ಹೆಜ್ಜೆ ಹಾಕಲು ಪರದಾಡುತ್ತ ಅವರ ಜೊತೆ ಗಣಿತ ಸಂಶೋಧನೆಗಳಿಗೆ ಕೂರುತ್ತಿದ್ದ ಈ ಗಣಿತಜ್ಞರ ಹೆಂಡತಿಯರು ತಮ್ಮ ಗಂಡಂದಿರ ಅವಸ್ಥೆಯನ್ನು ನೋಡಲಾಗದೆ "ಸ್ವಲ್ಪ ಬಿಡುವು ಮಾಡಿಕೊಳ್ಳಬಾರದೆ? ಮಲಗಿ ವಿಶ್ರಾಂತಿ ತೆಗೆದುಕೊಳ್ಳಬಾರದೆ?" ಎಂದರೆ ಏರ್ಡಿಶ್, "ಸತ್ತ ಮೇಲೆ ಗೋರಿಯಲ್ಲಿ ಮಲಗಿ ಬೇಕಾದಷ್ಟು ವಿಶ್ರಾಂತಿ ಪಡೆದುಕೊಳ್ಳಬಹುದು. ಆದರೆ, ಈ ಸಮಯ ಮತ್ತೆ ಬಂದೀತೇ?" ಎಂದು ಕೇಳುತ್ತಿದ್ದರು. ಅವರಜೊತೆ ನಾಲ್ಕು ದಿನ ನಿದ್ದೆಗೆಟ್ಟು ಲೆಕ್ಕ ಮಾಡುತ್ತ ಕೂತವರು ಏರ್ಡಿಶ್ ಹೊರಟುಹೋಗುತ್ತಲೇ ಒಂದೆರಡು ವಾರ ಸುಸ್ತಾಗಿ ಬಿದ್ದುಕೊಳ್ಳುತ್ತಿದ್ದರು ಇಲ್ಲವೇ ಜ್ವರ ಬಂದು ಮಲಗುತ್ತಿದ್ದರು! ಆದರೆ, ಏರ್ಡಿಶ್ ಮಾತ್ರ ಯಾವ ಶೀತಜ್ವರಬಾಧೆಗಳಿಗೂ ಕ್ಯಾರೇ ಅನ್ನದೆ ಗಣಿತ ಗಣಿತ ಎಂದು ಬಡಬಡಿಸುತ್ತ ಒಂದು ಮನೆಯಿಂದ ಇನ್ನೊಂದು ಮನೆಗೆ ಹೋಗಿಬಿಡುತ್ತಿದ್ದರು. ಈ ಕ್ರಮ ಜೀವನಪರ್ಯಂತ ಎಂದೂ ತಪ್ಪಲಿಲ್ಲ.

        ನಗರಕ್ಕೆ ಏರ್ಡಿಶ್ ಬರುತ್ತಿದ್ದಾರೆಂದರೆ ಗಣಿತಜ್ಞರ ಕಿವಿ ಚುರುಕಾಗುತ್ತಿದ್ದವು. ಎಲ್ಲರೂ ನಾಮುಂದು ತಾಮುಂದು ಎಂದು ಏರ್ಡಿಶ್‍ರನ್ನು ಮನೆಗೆ ಕರೆದೊಯ್ಯಲು ಹಾತೊರೆಯುತ್ತಿದ್ದರು. ಇದಕ್ಕೆ ಕಾರಣವೂ ಇತ್ತು. ಏರ್ಡಿಶ್ ಏನಾದರೂ ಮನೆಗೆ ಬಂದು ಉಳಿದುಕೊಂಡರೆ, ಆ ಮೂರ್ನಾಲ್ಕು ದಿನಗಳ ಕಾಲ, ಮುಂದಿನ ಮೂರ್ನಾಲ್ಕು ವರ್ಷಗಳಿಗಾಗುವಷ್ಟು ಗಣಿತ ಸಮಸ್ಯೆಗಳನ್ನು ಕೊಟ್ಟು ಹೋಗುತ್ತಿದ್ದರು. ಇದುವರೆಗೆ ಜೀವನಪೂರ್ತಿ ಕುಳಿತು ತಲೆಕೆಡಿಸಿಕೊಂದರೂ ಪರಿಹರಿಸಲಾಗದ ಸಮಸ್ಯೆಗಳನ್ನು ಏರ್ಡಿಶ್ ಮುಂದೆ ಹಿಡಿದರೆ ಅವುಗಳಲ್ಲಿ ಬಹಳಷ್ಟಕ್ಕೆ ಪರಿಹಾರ ಸಿಗುವುದು ಖಾತ್ರಿಯಿತ್ತು. ಅಲ್ಲದೆ, ಆ ಮೂರ್ನಾಲ್ಕು ದಿನಗಳಲ್ಲಿಯೇ ಏರ್ಡಿಶ್ ತನ್ನ ಅತಿಥೇಯನ ಜೊತೆ ಕೂತು ಒಂದೆರಡು ಅತಿ ಮಹತ್ವದ, ಗಣಿತ ಪ್ರಪಂಚದಲ್ಲಿ ಸಾಕಷ್ಟು ಸಂಚಲನ ಎಬ್ಬಿಸಬಲ್ಲ ವಿಚಾರಪೂರ್ಣ ವಿದ್ವತ್ ಲೇಖನಗಳನ್ನು ಬರೆದುಬಿಡುತ್ತಿದ್ದರು. ಏರ್ಡಿಶ್ ಜೊತೆ ಸಂಶೋಧನ ಪ್ರಬಂಧ ಬರೆದಿದ್ದಾನೆ ಎಂದರೆ, ಆ ಗಣಿತಜ್ಞನ ಗೌರವ-ಮರ್ಯಾದೆಗಳು ನೂರ್ಮಡಿ ಹೆಚ್ಚಾಗಿಬಿಡುತ್ತಿದ್ದವು!

            ಅಲ್ಲದೆ, ಏರ್ಡಿಶ್ ಅವರಿಗೆ ಯಾವ ಗೆಳೆಯನನ್ನು ಭೇಟಿಯಾದರೂ ಆತನನ್ನು ಕಳೆದ ಬಾರಿ ಭೇಟಿಯಾದಾಗ ಏನೇನು ಚರ್ಚಿಸಿದ್ದೆ ಎನ್ನುವುದು ಹತ್ತು ನಿಮಿಷದ ಹಿಂದೆಯಷ್ಟೇ ನಡೆದ ಘಟನೆಗಳಮ್ತೆ ಸ್ಫಟಿಕ ಸದೃಶ್ಯ ಚಿತ್ರಣ ಇರುತ್ತಿತ್ತು. "ಕಳೆದ ಬಾರಿ ನಾವೊಂದು ಸಮಸ್ಯೆಯನ್ನು ಇಷ್ಟು ಭಾಗ ಚರ್ಚಿಸಿ ನಿಲ್ಲಿಸಿದ್ದೆವು. ಅಲ್ಲಿಂದ ಈಗ ಮುಂದುವರಿಸೋಣ" ಎಂದು ಕ್ವಚಿತ್ತಾಗಿ ಖಚಿತವಾಗಿ ಹೇಳಿ ಗೆಳೆಯರನ್ನು ದಿಗ್ಭ್ರಾಂತಗೊಳಿಸುವ ಸ್ಮರಣಶಕ್ತಿ ಏರ್ಡಿಶ್‍ರಿಗಿತ್ತು. ಅಷೇ ಅಲ್ಲ, ಗಣಿತದ ಹೊರತಾಗಿಯೂ ಭರಪೂರ ಬಾಯಿಕಳೆದು ನಗುತ್ತ, ಒಳ್ಳೆಯ ಊಟವನ್ನು ಮನಸ್ಸು ತುಂಬಿ ಹೊಗಳಿ ಉಣ್ಣುತ್ತ, ಮಕ್ಕಳೊಂದಿಗೆ ಮಗುವಾಗಿ ಆಡುತ್ತ, ತನ್ನ ಗೆಳೆಯರ ಹೆಂಡತಿಯರೊಂದಿಗೆ ಜೋಕು ಹೊಡೆದು ನಗಿಸುತ್ತ ಇರುತ್ತಿದ್ದ ಏರ್ಡಿಶ್‍ ಎಲ್ಲರಿಗೂ ಬೇಕಾಗಿದ್ದವರೇ. ಅದ್ಭುತ ಸಂಗತಿ ಎಂದರೆ, ತಾನು ತನ್ನ ಜೀವನದಲ್ಲಿ ಕೆಲಸ ಮಾಡಿದ್ದ ಮೂರು ಸಾವಿರಕ್ಕೂ ಹೆಚ್ಚು ಗೆಳೆಯರ ಮಕ್ಕಳ ಹೆಸರು ಮತ್ತು ಅವರೇನು ಮಾಡುತ್ತಿದ್ದಾರೆ ಎಂಬುದನ್ನು ಸೂಪರ್ ಕಂಪ್ಯೂಟರಿನ ನಿಖರತೆಯಲ್ಲಿ ನೆನಪಿಟ್ಟುಕೊಂಡಿದ್ದರು ಈ ಮಹಾತ್ಮ!


ಎಪ್ಸಿಲಾನ್ ಗ್ಲಾಸಲ್ಲಿ ವಿಷ!
            ಏರ್ಡಿಶ್ ಹುಟ್ಟುಹಾಕಿದ ಹೊಸಶಬ್ದಗಳು ಗಣಿತ ಪ್ರಪಂಚದಲ್ಲಿ ಬಹಳ  ಹೆಸರು ಮಾಡಿದ್ದವು. ತನ್ನ ಹರೆಯದಲ್ಲಿ ನಾಜಿ ಸೈನಿಕರ ನೆರಳಿನಲ್ಲಿ ಬದುಕುತ್ತಿದ್ದಾಗ ಹೀಗೆ ಸಂಕೇತಭಾಷೆ ಬಳಸಿ ಮಾತಾಡಲು ತೊಡಗಿದ ಏರ್ಡಿಶರಿಗೆ ಮುಂದೆ ಅದೊಂದು ಹವ್ಯಾಸವೇ ಆಗಿ ಹೋಯಿತು. ಅವರ ಮಾತಿನಲ್ಲಿ ಎಪ್ಸಿಲಾನ್ ಎಂದರೆ ಮಗು ಎಂದರ್ಥ. (ಗಣಿತದ ಭಾಷೆಯಲ್ಲಿ ಸಣ್ಣಪ್ರಮಾಣವನ್ನು ಸೂಚಿಸಲು ಎಪ್ಸಿಲಾನ್ ಎಂಬ ಗ್ರೀಕ್ ಅಕ್ಷರವನ್ನು ಬಳಸುತ್ತೇವೆ) ಬಾಸ್ ಎಂದರೆ ಹೆಂಡತಿ. ಗುಲಾಮ ಎಂದರೆ ಗಂಡ. ಸತ್ಸಂಗ ಎಂದರೆ ಗಣಿತ ಉಪನ್ಯಾಸ. ವಿಷ ಎಂದರೆ ಮದ್ಯ! ಗೆಳೆಯರ ಮನೆಗಳಲ್ಲಿ ಗಣಿತದಲ್ಲಿ ಮುಳುಗಿ ತಲೆಚಿಟ್ಟು ಹಿಡಿದು "ನನಗೆ ಎಪ್ಸಿಲಾನ್ ಪ್ರಮಾಣದ ವಿಷ ಕೊಡಿ" ಎಂದು ಅವರು ಹೇಳಿದರೆ, ವೈನ್ ತುಂಬಿದ ಸಣ್ಣ ಗ್ಲಾಸು ಅವರೆದುರು ಬರುತ್ತಿತ್ತು! "ಈ ಮೌನ ಸಾಕು, ಸ್ವಲ್ಪ ಗದ್ದಲ ಮಾಡಿ" ಎಂದರೆ ಎರ್ಡಿಶ್ ಗೆಳೆಯರು ಟೇಪ್‍ರೆಕಾರ್ಡಿನಲ್ಲಿ ಶಾಸ್ತ್ರೀಯ ಸಂಗೀತ ಹಾಕುತ್ತಿದ್ದರು!

            ಗಣಿತಜ್ಞ ಎಂದಾಗ ನಮಗೆಲ್ಲ ಬರುವ ಕಲ್ಪನೆಯೆಂದರೆ, ಅವರು ತಮ್ಮ ತಲೆ ಕೆದರಿಕೊಂಡು ದೀರ್ಘವಾಗಿ ಉಸಿರೆಳೆದುಕೊಂಡು ಧ್ಯಾನಸ್ಥರಾದಂತೆ ಯೋಚನೆ ಮಾಡುತ್ತ ಗಂಟೆಗಟ್ಟಲೆ ಬರೆಯುತ್ತಿರುತ್ತಾರೆ ಅನ್ನುವದು. ಏರ್ಡಿಶ್ ಅವರನ್ನು ನೋಡಿದರೆ ಈ ಕಲ್ಪನೆ ತಲೆಕೆಳಗಾಗಲು ಎಲ್ಲ ಸಾಧ್ಯತೆಗಳು ಇದ್ದವು. ಏರ್ಡಿಶ್ ಯಾವಾಗ ಗಣಿತವನ್ನು ಯೋಚಿಸುತ್ತಿದ್ದಾರೆ, ಯಾವಾಗ ಅವರಿಗೆ ಒಂದು ಹೊಸ ಫಲಿತಾಂಶ, ಪ್ರಮೇಯ, ಸಮಸ್ಯೆ, ಸಾಧನೆ ಹೊಳೆಯಿತು ಎಂದು ಹೇಳಲು ಸಾಧ್ಯವೇ ಇರಲಿಲ್ಲ. ಯಾಕೆಂದರೆ, ಏರ್ಡಿಶ್ ಪೆನ್ನು ಪೇಪರು ಹಿಡಿದು ಗಂಟೆಗಟ್ಟಲೆ ಗೋಡೆಯನ್ನು ದಿಟ್ಟಿಸುತ್ತ ಕೂತು ಯೋಚಿಸುವ ಹುಳು ಆಗಿರಲಿಲ್ಲ. ಅವರಿಗೆ ರೈಲಿನಲ್ಲಿ ಪ್ರಯಾಣಿಸುವಾಗ, ಊಟ ಮಾಡುವಾಗ, ಬೀಚ್‍ನಲ್ಲಿ ಮರಳ ಮೇಲೆ ನಡೆಯುವಾಗ, ಸಂಗೀತ ಕೇಳುವಾಗ, ಗೆಳೆಯರ ಜೊತೆ ಕೂತು ಜೋಕು ಹೊಡೆಯುತ್ತ ನಗುವಾಗ - ಹೀಗೆ ಎಲ್ಲೆಂದರೆಲ್ಲಿ ಯಾವ ಕ್ಷಣದಲ್ಲಾದರೂ ಹೊಸ ಫಲಿತಾಂಶಗಳು ಹೊಳೆದುಬಿಡುತ್ತಿದ್ದವು! ಏಕಕಾಲಕ್ಕೆ ಅವರು ಐವತ್ತು ಅರವತ್ತು ಸಂಶೋಧನ ಲೇಖನಗಳ ಮೇಲೆ ಕೆಲಸ ಮಾಡುತ್ತಿದ್ದರು. ನಾಲ್ಕೈದು ಜನ ಗಣಿತಜ್ಞ ಗೆಳೆಯರೊಂದಿಗೆ ಕೂತು ಮಾತಾಡುವಾಗ ಆ ಅಷ್ಟೂ ಜನರ ಜೊತೆ ಬೇರೆ ಬೇರೆ ಸಮಸ್ಯೆಗಳನ್ನು ಏಕಕಾಲಕ್ಕೆ ಚರ್ಚಿಸುವ ಪವಾಡವೆಂಬಂಥ ಶಕ್ತಿ ಅವರಿಗಿತ್ತು! ಯಾವುದಾದರೂ ಸಮಸ್ಯೆಯನ್ನು ಬಿಡಿಸಲು ತಾನು ಈಗಾಗಲೇ ಕಂಡುಹಿಡಿದಿದ್ದ ಫಲಿತಾಂಶವೊಂದರ ನೆರವು ಬೇಕಾದರೆ, ಆ ಉತ್ತರವನ್ನು ಎಂದು ಪಡೆದಿದ್ದೆ, ಹೇಗೆ ಪಡೆದಿದ್ದೆ ಎನ್ನುವುದನ್ನೆಲ್ಲ ಪುನರ್‌ರೂಪಿಸುವ ಜಾಣ್ಮೆ, ತಾಳ್ಮೆ ಏರ್ಡಿಶಗಿತ್ತು.

            ಏರ್ಡಿಶ್ ಪ್ರಿನ್ಸ್‍ಟನ್ನಿನ ಉನ್ನತ ಅಧ್ಯಯನ ಸಂಸ್ಥೆಯಲ್ಲಿದ್ದಾಗ, ಈ ಮನುಷ್ಯ ಕೆಲಸವೇ ಮಾಡೋದಿಲ್ಲ ಎಂದು ಡೈರೆಕ್ಟರ್ ಸಾಹೇಬರಿಗೆ ದೂರುಗಳು ಹೋದವಂತೆ. ಯಾಕೆಂದರೆ, ಯಾವಾಗ ನೋಡಿದರೂ ಏರ್ಡಿಶ್, ಗೆಳೆಯರು ಮತ್ತು ಸಹೋದ್ಯೋಗಿಗಳ ಜೊತೆ ಮಾತಾಡುತ್ತಾ ತಿರುಗಾಡುತ್ತಾ ಇದ್ದದ್ದೇ ಕಾಣುತ್ತಿತ್ತು. ಅದಿಲ್ಲವಾದರೆ, ಹಾವು ಏಣಿಯನ್ನು ಹೋಲುವ "ಗೋ" ಎಂಬ ಆಟವನ್ನು ತನ್ನೊಡನೆ ಇದ್ದವರ ಜೊತೆ ಆಡುತ್ತ ಸಮಯ ಕಳೆಯುವ ಹಾಗೆ ತೋರುತ್ತಿತ್ತು. ಪಿಂಗ್‍ಪಾಂಗ್ ಆಡುತ್ತ, ಜೋಕು ಹೇಳುತ್ತ ತಿರುಗುವ ಈ ಮನುಷ್ಯನನ್ನು ಯಾರು ಗಣಿತಜ್ಞ ಅಂತ ಕರೆದವರು ಎಂದು ದೂರದಿಂದ ನೋಡಿ ಪೂರ್ವಗ್ರಹ ಬೆಳೆಸಿಕೊಂಡ ವಿದ್ವಾಂಸರು ನಿರ್ದೇಶಕರ ಕಿವಿ ಊದಿದರು. ಆದರೆ, ನಿರ್ದೇಶಕ, ಆ ವರ್ಷ ಏರ್ಡಿಶ್ ಬರೆದ ಅತ್ಯಂತ ಮೌಲಿಕವಾದ ಗಣಿತದ ಮೇಲಿನ ಸಂಶೋಧನಾ ಬರಹಗಳನ್ನು ಈ ದೂರುದಾರದ ಮುಖಕ್ಕೆ ಹಿಡಿದಾಗ ಅವರೆಲ್ಲರ ಬಾಯಿ ಕಟ್ಟಿಹೋಯಿತು. ಪ್ರಿನ್ಸ್‍ಟನ್ನಿನ ಇತಿಹಾಸದಲ್ಲಿ ಹತ್ತು ವರ್ಷದ ಅವಧಿಯಲ್ಲಿ ಯಾರೊಬ್ಬ ಸಂಶೋಧಕ ಪ್ರಕಟಿಸಿದ ಪ್ರಬಂಧಗಳಿಗಿಂತಲೂ ಹೆಚ್ಚಾ ಬೆಳೆಯನ್ನು ಏರ್ಡಿಶ್ ಒಂದು ವರ್ಷದಲ್ಲಿ ತೆಗೆದು ತೋರಿಸಿದ್ದರು!


ಗಣಿತದ ಗಣಿ, ಮಾನವತೆಯ ಮಣಿ.
            ಇಷ್ಟಕ್ಕೂ ಈ ಮನುಷ್ಯ ಬರೆದಿದ್ದಾದರೂ ಎಷ್ಟು ಎನ್ನುತ್ತೀರಾ? ಬರೋಬ್ಬರಿ ಒಂದೂವರೆ ಸಾವಿರ ಸಂಶೋಧನಾ ಲೇಖನಗಳು! ಇಡೀ ಜಗತ್ತಿನ ಇತಿಹಾಸದಲ್ಲಿ ಇದುವರೆಗೆ ಬದುಕಿದ ಯಾವುದೇ ಗಣಿತಜ್ಞ ಅಥವಾ ವಿಜ್ಞಾನಿ ತನ್ನ ಜೀವಿತದಲ್ಲಿ ಪ್ರಕಟಿಸಿದ ಸಂಶೋಧನಾ ಪ್ರಬಂಧಗಳಿಗಿಂತ ಹೆಚ್ಚು ಬರೆದು ಪ್ರಕಟಿಸಿದ ಕೀರ್ತಿಯ ಪತಾಕೆಯನ್ನು ವಿನಯದಿಂದ ಹೊತ್ತವರು ಈ ಏರ್ಡಿಶ್! ತಾನು ಬರೆದದ್ದು ಮಾತ್ರವಲ್ಲ, ಬೇರೆಯವರನ್ನು ಉತ್ತೇಜಿಸಿ ಬರೆಸಿದರು. ಎರ್ಡಿಶ್ ಜೊತೆ ಸೇರಿ ತಮ್ಮ ಸಂಶೋಧನಾ ಬರಹಗಳನ್ನು ಪ್ರಕಟಿಸಿದವಏ ಐನೂರೊಂದು ಮಂದಿ! ಐವತ್ತರ ದಶಕದಲ್ಲಿ ಏರ್ಡಿಶ್ ಬರೆದ ಬರಹಗಳ ಮತ್ತು ಸಹ ಬರಹಗಾರರ ಸಂಖ್ಯಾಬಾಹ್ಯ್ಳ್ಯವನ್ನು ಗುರುತಿಸಿ ಅದರ ಪ್ರಕಾರ, ಏರ್ಡಿಶ್ ಜೊತೆ ನೇರವಾಗಿ ಸಂಶೋಧನೆಯಲ್ಲಿ ತೊಡಗಿಕೊಂಡು ಪ್ರಬಂಧಗಳನ್ನು ಬರೆದು ಪ್ರಕಟಿಸಿದವರ ಏರ್ಡಿಶ್ ಸಂಖ್ಯೆ -೧. ಇನ್ನು ಅಂತಹ ಸಹ ಲೇಖಕರ ಜೊತೆ ಸೇರಿಕೊಂಡು ತಮ್ಮ ಬರಹಗಳನ್ನು ಪ್ರಕಟಿಸಿದವರ ಏರ್ಡಿಶ್ ಸಂಖ್ಯೆ -೨. ಹಾಗೆಯೇ ಏರ್ಡಿಶ್ ಜೊತೆ ಸಂಶೋಧನಾ ಪ್ರಬಂಧ ಬರೆದವರ ಜೊತೆ ಸೇರಿ ಬರೆದವರ ಏರ್ಡಿಶ್ ಸಂಖ್ಯೆ -೩. ಇದು ಹೀಗೇ ಮುಂದುವರಿಯುತ್ತಾ ಹೋಗಿ ಈಗ ಜಗತ್ತಿನಲ್ಲಿ ಏರ್ಡಿಶ್ ಸಂಖ್ಯೆ ೧೫ ಆಗಿರುವರೂ ಇದ್ದಾರೆ! ತನಗೂ ಒಂದು ಏರ್ಡಿಶ್ ಸಂಖ್ಯೆ ಅಂತ ಹೇಳಿಕೊಳ್ಳುವುದು ಗಣಿತಜ್ಞರಿಗೆ ನೊಬೆಲ್ ಪ್ರಶಸ್ತಿ ಸಿಕ್ಕಿದಾಗ ಸಿಗುವ ಸಂಭ್ರಮಕ್ಕಿಂತಲೂ ಮಿಗಿಲಾದದ್ದು! ಅಂದಹಾಗೆ, ಜಗದ್ವಿಖ್ಯಾತ ವಿಜ್ಞಾನಿ ಐನ್‍ಸ್ಟೈನ್ ಅವರ ಏರ್ಡಿಶ್ ಸಂಖ್ಯೆ - ೨.

            ಮನೆಮಠ ಕಟ್ಟಿಕೊಳ್ಳದೆ ಅಲೆಮಾರಿಯಂತೆ ತಿರುಗುತ್ತಿದ್ದ ಏರ್ಡಿಶ್ ದುಡ್ಡಿನ ಅಮಲು ಎಂದೂ ತಲೆಯನ್ನು ಹತ್ತಿ ಕೂರಲು ಬಿಡಲಿಲ್ಲ. ತಾನು ಹೋದ ಎಲ್ಲ ಗಣಿತ ಸಂಕಿರಣಗಳಲ್ಲಿ ಅವರು ಗಣಿತದ ಹೊಸ ಹೊಸ ಸಮಸ್ಯೆಗಳನ್ನು ಸೃಷ್ಟಿಸಿ ಸಭಿಕರ ಮುಂದಿಡುತ್ತಿದ್ದರು. ಅಷ್ಟೇ ಅಲ್ಲ, ಬಹುಮುಖ್ಯವಾದದ್ದು ಎಂದು ಅನ್ನಿಸಿದ ಲೆಕ್ಕಗಳಿಗೆ ತಾನೇ ಕೆಲವು ಸಾವಿರ ಡಾಲರುಗಳ ಬಹುಮಾನವನ್ನು ಘೋಷಿಸಿಬಿಡುತ್ತಿದ್ದರು. ತನ್ನ ಪಂಥಾಹ್ವಾನವನ್ನು ಸ್ವೀಕರಿಸಿ ಸಮಸ್ಯೆ ಪರಿಹಾರ ಮಾಡಿದ ಗೆಳೆಯರಿಗೆ ಬಹುಮಾನದ ಮೊತ್ತವನ್ನು ಉದಾರವಾಗಿ ಕೊಟ್ಟುಬಿಡುತ್ತಿದ್ದರು. ಸಂಶೋಧನಾ ಲೇಖನಗಳನ್ನು ಬರೆದು ಬಂದ ಸಂಭಾವನೆಯ ದುಡ್ಡೆಲ್ಲವೂ ಹೀಗೆ ಹರಡಿ ಹಂಚಿಹೋಗಿತ್ತು. ಹಾರ್ವರ್ಡ್‍ನಲ್ಲಿ ದುಡ್ದಿನ ಮುಗ್ಗಟ್ಟಿನಿಂದ ಒದು ಮುಂದುವರಿಸಲಾಗದೆ ಕಂಗೆಟ್ಟು ಕೂತಿದ್ದ ವಿದ್ಯಾರ್ಥಿಯೊಬ್ಬನಿಗೆ ಒಂದು ಸಾವಿರ ಡಾಲರುಗಳನ್ನು ಕೊಟ್ಟು "ಇದನ್ನು ಇಟ್ಟುಕೋ, ಓದನ್ನು ಮುಂದುವರಿಸು. ಮುಂದೆ ದುಡಿಯುವ ಬಲ ಬಂದ ಮೇಲೆ ಹಿಂದುರುಗಿಸು" ಎಂದು ಬೆನ್ನು ತಟ್ಟಿದರು ಏರ್ಡಿಶ್. ಆ ಹುಡುಗ, ಆ ನೆರವಿನಿಂದ ಪದವಿ ಮುಗಿಸಿ ಕೃತಜ್ಞತೆಯಿಂದ ದುಡ್ಡು ಹಿಂದಿರುಗಿಸಲು ಬಂದಾಗ ಏರ್ಡಿಶ್ ಅದನ್ನು ತೆಗೆದುಕೊಳ್ಳದೆ, "ನಾನು ನಿನಗೆ ಮಾಡಿದ್ದನ್ನೇ ನೀನು ಇನ್ನೊಬ್ಬನಿಗೆ ಮಾಡು" ಎಂದು ಕಳಿಸಿಬಿಟ್ಟರು! ಗಣಿತಲೋಕದ ಅತ್ಯಂತ ಪ್ರತಿಷ್ಟಿತ ವೂಲ್ಫ್ ಪ್ರಶಸ್ತಿಯನ್ನು ಪಡೆದ ನಂತರ ಅದರ ಜೊತೆ ಬಹುಮಾನದ ಮೊತ್ತವಾಗಿ ಬಂದ ಐವತ್ತು ಸಾವಿರ ಡಾಲರುಗಳಲ್ಲಿ ದಾನಧರ್ಮ ಎಲ್ಲ ಕಳೆದು ಏರ್ಡಿಶ್ ತನಗಾಗಿ ಇಟ್ಟುಕೊಂಡದ್ದು ಕೇವಲ ಏಳ್ನೂರ ಇಪ್ಪತ್ತು ಡಾಲರುಗಳನ್ನು ಮಾತ್ರ!

            ದಾರಿಯಲ್ಲಿ ಸಿಗುವ ಯಾವ ಭಿಕ್ಷುಕನನ್ನೂ ಬರಿಗೈಯಲ್ಲಿ ಕಳಿಸಿದ ಉದಾಹರಣೆ ಏರ್ಡಿಶ್ ಜೀವನದಲ್ಲಿ ಇರಲಿಲ್ಲ. ಗಣಿತದ ಹೊರತಾದ ಜಗತ್ತಿನಲ್ಲಿ ಅವರು ತೋರಿಸುತ್ತಿದ್ದ ಅನುಪಮವಾದ ಮಾನವೀಯತೆ ಎಂಥವರ ಹೃದಯವನ್ನೂ ಕರಗಿಸಿಬಿಡುತ್ತಿತ್ತು. ಏರ್ಡಿಶ್ ಹೆಸರಲ್ಲಿದ್ದ ಬ್ಯಾಂಕ್ ಅಕೌಂಟಿಗೆ ಬರುವ ಹೋಗುವ ದುಡ್ಡಿನ ಲೆಕ್ಕಾಚಾರವನ್ನು ನೋಡಿಕೊಳ್ಳುತ್ತಿದ್ದದ್ದು ಅವರ ಜೀವನ ಗೆಳೆಯ, ಗಣಿತಜ್ಞ ರಾನ್ ಗ್ರಹಾಮ್. ಏರ್ಡಿಶ್ ತನ್ನ ಗೆಳೆಯರನ್ನು ಮನಃಪೂರ್ವಕ ನಂಬುತ್ತಿದ್ದರು. ಅವರ ಗೆಳೆಯರೂ ಅಷ್ಟೇ - ಎಂದೆಂದೂ ಏರ್ಡಿಶ್‍ರ ಪ್ರೀತಿ ಮತ್ತು ಗೆಳೆತನಕ್ಕೆ ನಿಷ್ಠರಾಗಿದ್ದರು. ಗಣಿತ ಬಿಟ್ಟರೆ ಹೊರಜಗತ್ತಿನ ವ್ಯವಹಾರಗಳಲ್ಲಿ ಮಗುವಿನಂತೆ ಮುಗ್ಧರಾಗಿದ್ದ ಏರ್ಡಿಶ್‍ರಿಗೆ ಮೋಸ ಮಾಡಿ ಆಗಬೇಕಾದದ್ದು ಏನೂ ಇರಲಿಲ್ಲ! ಎಷ್ಟೋ ಸಲ, ಈ ಮನುಷ್ಯ ನಗರದಿಂದ ಹಲವಾರು ಮೈಲಿ ದೂರದಲ್ಲಿರುವ ವಿಚಾರ ಸಂಕಿರಣದ ಸ್ಥಳಗಳಿಗೆ ಹೋಗಬೇಕಾಗಿ ಬಂದಾಗ, ಆ ದಾರಿಯಲ್ಲಿ ಹೋಗುವ ಯಾವುದೇ ವಾಹನವನ್ನು ನಿಲ್ಲಿಸಿ ಆ ದಾರಿಹೋಕರ ಜೊತೆ ಸ್ನೇಹ ಮಾಡಿಕೊಂಡು ಹೊರಟುಬಿಡುತ್ತಿದ್ದರು!


ಮಗನಿಗೆ ತಕ್ಕ ಅಮ್ಮ

        ಎರ್ಡಿಶ್‍ರನ್ನು ಜೀವಕ್ಕಿಂತ ಹೆಚ್ಚಾಗಿ ಪ್ರೀತಿಸಿದ ಅವರ ತಾಯಿ ಕೊನೆಗಾಲದಲ್ಲಿ ತನ್ನ ಮಗನ ಜೊತೆ ತಾನೂ ಪ್ರಪಂಚ ಪರ್ಯಟನೆಗೆ ಟೊಂಕ ಕಟ್ಟಿ ನಿಂತುಬಿಟ್ಟಳು! ಆಗ ಆಕೆಗೆ ಕೇವಲ ಎಂಭತ್ನಾಲ್ಕು ವರ್ಷ! ತನ್ನ ಮಗನ ಆರೋಗ್ಯ, ಯೋಗಕ್ಶೇಮ ನೋಡಿಕೊಳ್ಳುವುದು ಮಾತ್ರವಲ್ಲ, ಆತ ಬರೆದ ಅಷ್ಟೂ ಸಾವಿರ ಸಂಶೋಧನ ಲೇಖನಗಳನ್ನು ಭದ್ರವಾಗಿ ಅಚ್ಚುಕಟ್ಟಾಗಿ ತನ್ನ ಮನೆಯಲ್ಲಿ ಜೋಡಿಸಿಡುವ ಕೆಲಸವನ್ನು ಮಾಡುತ್ತಿದ್ದವಳೂ ಅವಳೇ. ತಾನು ಬರೆದ ಯಾವುದರ ಮೇಲೆಯೂ ಹಂಗಿಲ್ಲದೆ ವಿರಾಗಿಯಾಗಿ ಬದುಕುತ್ತಿದ್ದ ಏರ್ಡಿಶ್ ಬಳಿ ಇರುತ್ತಿದ್ದದ್ದು - ಎರಡು ಜೊತೆ ಪ್ಯಾಂಟು ಷರ್ಟು ಮತ್ತು ನಿದ್ದೆ ಬರದಂತೆ ಎಚ್ಚರವಿದ್ದು ಕೂರಲು ಬೆಕಾಗಿದ್ದ ಬೆಂಜಡ್ರೀನ್ ಮಾತ್ರೆಗಳ ಸಣ್ಣ ಡಬ್ಬ ಮಾತ್ರ. ಆ ಮಹಾತಾಯಿ ತನ್ನ ತೊಂಭತ್ತಮೂರನೆ ವಯಸ್ಸಿನಲಿ ಎರ್ಡಿಶ್ ಜೊತೆ ಒಂದು ಗಣಿತದ ವಿಚಾರ ಸಂಕಿರಣಕ್ಕೆ ಹೋಗುತ್ತಿದ್ದಾಗ ತೀರಿಕೊಂಡ ಮೇಲೆ, ಏರ್ಡಿಶ್ ಪೂರ್ತಿ ಇಳಿದು ಹೋದರು. ತನ್ನ ಜೊತೆ ಅರವತ್ತು ವರ್ಷಗಳ ಕಾಲ ಜೊತೆಯಾಗಿ ತನ್ನ ಬದುಕಿನ ಸಮಸ್ತ ಅಗತ್ಯಗಳನ್ನೂ ನೋಡಿಕೊಳ್ಳುತ್ತಿದ್ದ ಪ್ರೀತಿಯ ತಾಯಿಯನ್ನು ಕಳೆದುಕೊಂಡ ಮೇಲೆ ಅವರು ಬಹುಪಾಲು ಖಿನ್ನರಾದರು. ತನ್ನ ಪ್ರೀತಿಯ ಹಂಗೆರಿಯ ಮನೆಗೆ ಅವರು ಮತ್ತೆಂದೂ ಹೋಗಲೇ ಇಲ್ಲ.

ತಲೆಯಿರುವಾಗ ಕಂಪ್ಯೂಟರ್ ಯಾಕೆ!

            ಗೋಮುಖದಿಂದ ಗಂಗೆ ಇಳಿದಂತೆ ಏರ್ಡಿಶ್ ಸಹಸ್ರಾರದಿಂದ ಸಹಸ್ರ ಸಹಸ್ರ ಸಂಖ್ಯೆಯ ಪ್ರಮೇಯಗಳು ಹುಟ್ಟಿಬರುತ್ತಿದ್ದವು. ಇಷ್ಟೆಲ್ಲವನ್ನು ಹೊತ್ತುಕೊಂಡು ತಿರುಗುವ ಈ ಮನುಷ್ಯ ನಿಜವಾದ ಸೂಪರ್ ಕಂಪ್ಯೂಟರ್ ಎಂದು ಜನ ಹೇಳಿದರೆ, ಏರ್ಡಿಶ್‍ಗೆ ಅವೆಲ್ಲ ಅರ್ಥವೇ ಆಗುತ್ತಿರಲಿಲ್ಲ. ಎಕೆಂದರೆ, ಅವರು ತನ್ನ ಜೀವಮಾನದಲಿ ಒಮ್ಮೆಯೂ ಕಂಪ್ಯೂಟರ್ ಬಳಸಲಿಲ್ಲ! ಪ್ರತಿವರ್ಷ ಎರ್ಡಿಶ್ ತನ್ನ ಗೆಳೆಯರಿಗೆ ಬರೆಯುತ್ತಿದ್ದ ಪತ್ರಗಳೇ ಒಂದೂವರೆ ಸಾವಿರ ದಾಟುತ್ತಿದ್ದವು! ತನ್ನ ಜೀವನದ ಅಷ್ಟು ವರ್ಷಗಳ ಕಾಲ ಕೇವಲ ಪತ್ರ, ಫೋನು ಮತ್ತು ಮುಖತಃ ಭೇಟಿಗಳ ಮೂಲಕವೇ ಕಾರ್ಯನಿರ್ವಹಿಸಿದ ಏರ್ಡಿಶ್ ಅದೇಕೋ ಹೊಸ ತಂತ್ರಜ್ಞಾನದಿಂದ ಮೈಲಿಗಟ್ಟಲೆ ಅಂತ ಕಾಯ್ದುಕೊಂಡರು. ಏರ್ಡಿಶ್ ಬರೆದ ಅದೆಷ್ಟೋ ಪ್ರಮೇಯ, ಫಲಿತಾಂಶಗಳು ಇಂದು ಗಣಕ ಕ್ಷೇತ್ರವನ್ನು ನಾಗಾಲೋಟದಲಿ ಮುಂದೋಡಿಸುತ್ತಿರುವ ಚಾಲಕಶಕ್ತಿಗಳು. ಜಗತ್ತಿನ ಬಹುತೇಕ ಎಲ್ಲ ಐಟಿ, ನೆಟವರ್ಕ್, ಫೈನಾನ್ಸ್ ಮತ್ತು ಇನ್ಶೂರೆನ್ಸ್ ಕಂಪೆನಿಗಳು ಒಂದಲ್ಲ ಒಂದು ರೀತಿಯಲ್ಲಿ ಈ ಮನುಷ್ಯ ಬರೆದ ಸಿದ್ಧಾಂತಗಳನ್ನು ಬಳಸುತ್ತಲೇ ಇರುತ್ತವೆ. ನಾವು ದಿನನಿತ್ಯ ಬಳಸುವ ಫೇಸಬುಕ್, ಟ್ವಿಟರ್‌ಗಳಂತಹ ಜಾಲತಾಣಗಳ ಪರದೆಯ ಹಿಂದೆ ನಿಂತಿರುವುದು ಕೂಡ ಇದೇ ಐದೂವರೆ ಅಡಿಯ ಏರ್ಡಿಶ್ ಮಹಾತ್ಮರೇ!

            ತಾನು ಹದಿನಾರರ ಹುಡುಗನಾಗಿದ್ದಾಗ ಭೇಟಿಯಾದ ವಸೋನಿಯ ಜೊತೆ ಕೊನೆಯವರೆಗೂ ಜೀವದ ಗೆಳೆತನ ಕಾಯ್ದುಕೊಂಡು ಬಂದರು ಏರ್ಡಿಶ್. ಒಮ್ಮೆ ವಸೋನಿಯ ಮನೆಯಲ್ಲಿ ತಂಗಿದ್ದಾಗ, ತನ್ನ ಇನ್ನೊಬ್ಬ ಗೆಳೆಯನ ಜೊತೆ ಫೋನಿನಲ್ಲಿ ಮಾತಾಡುತ್ತ, "ವಸೋನಿ? ಹೇಗೊ ಇದ್ದಾನೆ. ದಿನ ದೂಡುತ್ತಿದ್ದಾನೆ. ಹಳಬ, ಕಿವಿ ಬೇರೆ ಕೇಳಿಸೋಲ್ಲ!" ಅಂತ (ವಸೋನಿಯ ಎದುರೇ) ಗುಟ್ಟಾಗಿ ಅಂದರಂತೆ! ವಸೋನಿ ಇದನ್ನು ಕೇಳಿಸಿಕೊಂದ ಅನ್ನುವುದು ಗೊತ್ತಾದ ಮೇಲೆ, ಅವನ ಹೆಂಡತಿಯ ಬಳಿಹೋಗಿ, "ನಿನ್ನ ಗಂಡನಿಗೆ ಕಿವಿ ಸರಿಯಾಗೇ ಇದೆ. ಹಾಳಾಗಿರುವುದು ಕಿವಿಗಳ ನಡುವಿನದ್ದು!" ಅಂತ ಹೇಳಿ ಬಂದರಂತೆ! ಗೆಳೆಯರನ್ನು ಸದಾ ಕಾಲೆಳೆಯುತ್ತ ನಗಿಸುವ ಹಾಸ್ಯಪ್ರಜ್ಞೆ. ಇದ್ದದ್ದರಿಂದಲೇ ಅವರಿಗೆ ಜಗತ್ತಿನಾದ್ಯಂತ ಎಲ್ಲೆ ಹೋದರಲ್ಲಿ ಗೆಳೆಯರು, ಬಂಧುಗಳು, ಅಣ್ಣತಮ್ಮಂದಿರು ಹುಟ್ಟಿಕೊಂಡಿದ್ದು.

ರಂಗದಲ್ಲೇ ಕುಸಿದ ನಟ

            ನಿಜವಾದ ನಟ ತನ್ನ ಸಾವು, ಬಣ್ಣ ಹಚ್ಚಿ ರಂಗದ ಮೇಲೆ ನಟಿಸುತ್ತಿರುವಾಗಲೇ ಬರಲಿ ಎಂದು ಆಶಿಸುತ್ತಾನೆ. ಹಾಗೆಯೇ ಎರ್ಡಿಶ್ ತನ್ನ ಎಂಭತ್ತಮೂರನೇ ವಯಸ್ಸಿನಲ್ಲಿ ೧೯೯೬ರ ಸೆಪ್ಟೆಂಬರ್ ೨೦ರಂದು ಪೋಲೆಂಡಿನ ವಾರ್ಸಾದಲ್ಲಿ ಒಂದು ಗಣಿತ ಸಮ್ಮೇಳನದಲ್ಲಿ ಭಾಗವಹಿಸಿದ್ದಾಗ, ಹೃದಯಾಘಾತವಾಗಿ ತೀರಿಕೊಂಡರು. ಜೀವನಪೂರ್ತಿ ಗಣಿತವನ್ನೇ ಉಂಡು, ಹಾಸಿ ಹೊದ್ದು, ಗಣಿತಕ್ಕಾಗಿಯೇ ಜೀವ-ಜೀವನವನ್ನು ತೇಯ್ದ ಏರ್ಡಿಶ್ ತನ್ನ ಕೊನೆಯುಸಿರೆಳೆಯುವಾಗಲೂ ಯಾವುದೋ ಪ್ರಮೇಯವನ್ನು ಮನಸ್ಸಿನಲ್ಲೇ ಬರೆಯುತ್ತ ಅರ್ಧ ಮುಗಿಸಿದ್ದರೋ ಏನೋ! ದೇಶದೇಶಗಳ ನಡುವಿನ ಗಡಿರೇಖೆಗಳ ಹಂಗಿಲ್ಲದೆ, ಯಾವ ರಾಜಕೀಯದ ಕೊಚ್ಚೆಕೊಳಚೆಗೂ ಸಿಗದೆ, ಹಕ್ಕಿಯಂತೆ ಸ್ವಚ್ಚಂದವಾಗಿ ಜಗತ್ತೆಲ್ಲ ಸುತ್ತುತ್ತಿದ್ದ ಏರ್ಡಿಶ್ ಭಾರತಕ್ಕೂ ಹಲವಾರು ಬಾರಿ ಬಂದಿದ್ದರು. ಕೋಲ್ಕತ್ತ, ಮುಂಬೈ, ಚೆನ್ನೈಗಳಿಗೆ ಬಂದು ಹೋಗುತ್ತಿದ್ದರು. ಹಿಂದಿ ಭಾಷೆಯ ಪದ ಲಾಲಿತ್ಯಕ್ಕೆ ಮಾರುಹೋಗಿ ಹಲವಾರು ಪದಗಳನ್ನು ಕಲಿತಿದ್ದರು! ಹದಿನೈದು ಜನ ಭಾರತೀಯ ಗಣಿತಜ್ಞರ ಜೊತೆ ೨೩ ಸಂಶೋಧನಾ ಲೇಖನಗಳನ್ನು ಬರೆದಿದ್ದರು. ಭಾರತ ಕಂಡ ಅಪ್ರತಿಮ ಗಣಿತಜ್ಞ ಶ್ರೀನಿವಾಸ ರಾಮಾನುಜನ್ ಮೇಲೆ ಅಪಾರ ಪ್ರೀತಿ ಗೌರವ ಇಟ್ಟುಕೊಂಡಿದ್ದ ಏರ್ಡಿಶ್, `ರಾಮಾನುಜನ್ ಮತ್ತು ನಾನು' ಎಂಬ ಲೇಖನದಲ್ಲಿ ತಾನು ಈ ಭಾರತೀಯ ಗಣಿತ ಪಂಡಿತನಿಂದ ಹೇಗೆಲ್ಲ ಪ್ರಭಾವಿತನಾದೆ ಎಂಬುದನ್ನು ಗಣಿತದ ನೆಲೆಯಲ್ಲಿ ಹೇಳುತ್ತ ಹೋಗಿದ್ದಾರೆ.
            ದುರದೃಷ್ಟವಶಾತ್, ಏರ್ಡಿಶ್ ಹಾರಾಡುತ್ತಿದ್ದ ದಿಗಂತ ಭೂಮಿಗಿಂತ ಬಹಳ ಎತ್ತರದ್ದು. ಜನಸಾಮಾನ್ಯರಿಗೆ ಅರ್ಥವಾಗುವಷ್ಟು, ನಿಲುಕುವಷ್ಟು ಹತ್ತಿರಲ್ಲಿ ತೂಗುವ ಹಣ್ಣುಗಳು ಏರ್ಡಿಶ್ ತೋಟದಲ್ಲಿ ಕಡಿಮೆ. ಬರೆದ ಅಷ್ಟೂ ಪ್ರಬಂಧಗಳು ಚರ್ಚಿಸುವುದು ವಿಶ್ಲೇಷಣ ಸಂಖ್ಯಾಸಿದ್ಧಾಂತ, ಕಾಂಬಿನಟೋರಿಕ್ಸ್, ಸಂಭವನೀಯತಾ ಸಂಖ್ಯಾಸಿದ್ಧಾಂತ, ಗ್ರಾಫ್ ಥಿಯರಿ, ರಾಮ್ಸೀ ಥಿಯರಿಯಂತಹ ಉನ್ನತ ಸ್ತರದ ಗಣಿತವನ್ನೇ. ತಾನು ಬದುಕಿದ ಒಂದೊಂದು ವರ್ಷದಲ್ಲೂ ಒಬ್ಬ  ಮಹಾಮೇಧಾವಿ ತನ್ನ ಜೀವಮಾನವಿಡೀ ಕೂತು ಮಾಡಬಹುದಾಗಿದ್ದ ಸಾಧನೆಯನ್ನು ಸದ್ದಿಲ್ಲದೆ ಮಾಡಿಹೋದ. ಮಾನವಕುಲ ಏಳು ಸಾವಿರ ವರ್ಷ ತಪಸ್ಸು ಮಾಡಿ ಪಡೆಯಬಹುದಾಗಿದ್ದ ಸಿದ್ಧಿಯನ್ನು ಒಂದೇ ಜೀವಿತದಲ್ಲಿ ಪಡೆದು ಅದನ್ನು ನಮಗಾಗಿ ಬಿಟ್ಟುಹೋದ ಈ ಮಹತ್ಮನ ಗಣಿತ ನಮ್ಮ ಕೈಗೆಟುಕದಿದ್ದರೂ ಪರವಾಗಿಲ್ಲ, ಅವರು ಕಲಿಸಿದ ಮಾನವೀಯತೆಯ ಪಾಠ ನಮ್ಮೊಳಗೆ ಸದಾ ಮಿಡಿದರೆ ಅಷ್ಟೇ ಸಾಕು!

ಕೆ.ಎ.ಎಸ್.ಪರೀಕ್ಷೆಗೆ ಪರಿಷ್ಕೃತ ಪುಸ್ತಕಗಳ ಪಟ್ಟಿ

( Books list for K.A.S. Exam ) ಪ್ರಿಯ ಓದುಗರೇ, ಈಗಾಗಲೇ ಕೆ.ಎ.ಎಸ್.ಪರೀಕ್ಷೆಗೆ ಸಂಬಂಧಪಟ್ಟಂ ತೆ ಅವಶ್ಯವಾಗಿ ಓದಲೇಬೇಕಾದ ಪುಸ್ತಕಗಳ ಪಟ್ಟಿಯನ್ನು ಪ್ರಕಟಿಸಿದ್ದೆ. ಇದೀಗ ಪರಿಷ್ಕೃತ ಪುಸ್ತಕಗಳ ಪಟ್ಟಿಯನ್ನು ಮತ್ತೊಮ್ಮೆ ಪ್ರಕಟಿಸುತ್ತಿದ್ದೇನೆ. ಇದನ್ನು ನಮ್ಮ ಚಾಣಕ್ಯ ಕರಿಯರ್ ಅಕಾಡೆಮಿಯ ನಿರ್ದೇಶಕರಾದ ಶ್ರೀ ಎನ್.ಎಂ.ಬಿರಾದಾರ ಗುರುಗಳು ತರಗತಿಯಲ್ಲಿ ವಿದ್ಯಾರ್ಥಿಗಳಿಗೆ ನೀಡಿರುತ್ತಾರೆ. ನಿಮಗೆ ನನ್ನ ಈ ಪುಟ್ಟ ಪ್ರಯತ್ನ ಇಷ್ಟವಾಗಬಹುದು ಎಂದು ಭಾವಿಸುತ್ತೇನೆ. 
                                  
ಇತಿಹಾಸ ವಿಷಯದ ಪುಸ್ತಕಗಳು

೧. ಸಮಗ್ರ ಭಾರತದ ಇತಿಹಾಸ ಭಾಗ -1 ಲೇ. ಕೆ.ಎನ್.ಎ
೨. ಸಮಗ್ರ ಭಾರತ ಇತಿಹಾಸ ಭಾಗ -2 ಲೇ. ಕೆ.ಎನ್.ಎ
೩. ಕರ್ನಾಟಕ ಇತಿಹಾಸ ಲೇ. ಕೆ.ಎನ್.ಎ
೪. ಪ್ರಾಚೀನ ಇತಿಹಾಸ ಲೇ. ಡಾ|| ಕೆ.ಸದಾಶಿವ
೫. ಮಧ್ಯಕಾಲೀನ ಇತಿಹಾಸ  ಲೇ. ಡಾ|| ಕೆ. ಸದಾಶಿವ
೬. ಆಧುನಿಕ ಭಾರತದ ಇತಿಹಾಸ  ಲೇ. ಡಾ|| ಕೆ. ಸದಾಶಿವ
೭. ಸಮಗ್ರ ಕರ್ನಾಟಕ ಇತಿಹಾಸ ಲೇ. ಪಾಲಾಕ್ಷ
೮. ಇತಿಹಾಸ ವಿಶ್ವಕೋಶ  - ಮೈಸೂರು ವಿಶ್ವವಿದ್ಯಾಲಯ
೯. Indian History - Agni Hotri
೧೦. ಕರ್ನಾಟಕ ಕೈ ಗನ್ನಡಿ - ಸೂರ್ಯನಾಥ ಕಾಮತ್
೧೧. ಕರ್ನಾಟಕ ಏಕೀಕರಣ ಇತಿಹಾಸ - ಎಚ್.ಎಸ್. ಗೋಪಾಲರಾವ್
೧೨. ಸ್ವಾತಂತ್ರ್ಯ ಗಂಗೆಯ ಸಾವಿರ ತೊರೆಗಳು - ಶಂಕರ್‌ರಾವ್

ಭೂಗೋಳಶಾಸ್ತ್ರ

೧. ಪ್ರಾಕೃತಿಕ ಭೂಗೋಳ - ಡಾ|| ರಂಗನಾಥ ( ಪದವಿ ಮಟ್ಟದ್ದು)
೨. ಭಾರತದ ಭೂಗೋಳ - ಡಾ|| ರಂಗನಾಥ ( ಪದವಿ ಮಟ್ಟದ್ದು)
೩. ಕರ್ನಾಟಕ ಭೂಗೋಳ - ಡಾ|| ರಂಗನಾಥ
೪. Atlas Book - E.T.K. Publication
೫. Geography - Majeed Hussain

ಭಾರತದ ಸಂವಿಧಾನ

೧. ಭಾರತದ ಸಂವಿಧಾನ ಮತ್ತು ರಾಜಕೀಯ - ಪಿ.ಎಸ್. ಗಂಗಾಧರ
೨. ಭಾರತದ ಸಂವಿಧಾನ ಮತ್ತು ರಾಜಕೀಯ - ಎಚ್.ಎಮ್. ರಾಜಶೇಖರ
೩. Indian Polity - Dr. T.P. Devegowda
೪. ಭಾರತ ಸಂವಿಧಾನ - ಒಂದು ಪರಿಚಯ (ಮೆರುಗು ಪ್ರಕಾಶನ)
೫. Introduction to the constitution of India - D.D.Basu

ಅರ್ಥಶಾಸ್ತ್ರ

೧. ಭಾರತದ ಆರ್ಥಿಕ ವ್ಯವಸ್ಥೆ - ಎಚ್ಚಾರ್ಕೆ ( ಪದವಿ ಮಟ್ಟದ್ದು)
೨. ಆಧುನಿಕ ಭಾರತದ ಆರ್ಥಿಕ ಶಾಸ್ತ್ರ - ಡಾ|| ನೇ.ತಿ. ಸೋಮಶೇಖರ
೩. ಕರ್ನಾಟಕ ಆರ್ಥಿಕತೆ - ಎಚ್ಚಾರ್ಕೆ
೪. ಕರ್ನಾಟಕ ಆರ್ಥಿಕತೆ - ಡಾ|| ನೇ.ತಿ. ಸೋಮಶೇಖರ
೫. ಕರ್ನಾಟಕ ಆರ್ಥಿಕ ಸಮೀಕ್ಷೆ ( ಗವರ್ನಮೆಂಟ್ ಪಬ್ಲಿಕೇಷನ್)
೬. Indian Economy Survey - ( Indian Government publication )
೭. Indian Economy - Sundaram

ವಿಜ್ಞಾನ
೧. 8, 9, 10 ನೇ ತರಗತಿಯ ವಿಜ್ಞಾನ ಪುಸ್ತಕಗಳು
೨. ಜೀವಶಾಸ್ತ್ರ - ಹಂಪಿ ವಿಶ್ವವಿದ್ಯಾಲಯ
೩. ರಸಾಯನಶಾಸ್ತ್ರ - ಹಂಪಿ ವಿಶ್ವವಿದ್ಯಾಲಯ
೪. ಕೆ.ಎ.ಎಸ್. ನೋಟ್ಸ್ - ಮಾಲಿ ಮುದ್ದಣ್ಣ
೫. ಸಾಮಾನ್ಯ ವಿಜ್ಞಾನ - ಎಸ್.ಎಂ.ವಿ. ಗೋಲ್ಡ್ ಪ್ರಕಾಶನ
೬. ಜ್ಞಾನ-ವಿಜ್ಞಾನ ಕೋಶ - ನವಕರ್ನಾಟಕ ಪ್ರಕಾಶನ
೭. ವಿಜ್ಞಾನ ಕಲಿಯೋಣ ಭಾಗ ೧, ೨, ೩ - ಇಂದುಮತಿ ರಾವ್
೮. ವಿಜ್ಞಾನ - ತಂತ್ರಜ್ಞಾನ - ಸ್ವಪ್ನ ಪ್ರಕಾಶನ
೯. General science - Spectrum Notes
೧೦. ವಿಜ್ಞಾನ - ತಂತ್ರಜ್ಞಾನ - ಪ್ರಶ್ನೆಕೋಶ ( ಚಾಣಕ್ಯ ಪ್ರಕಾಶನ)

ಗಣಿತ ಮತ್ತು ಮೆಂಟಲ್ ಎಬಿಲಿಟಿ

1. All about Reasoning - Anjali Gupta
2. Verbal and Non-verbal Reasoning - R.S.Agarwal
೩. ಮೆಂಟಲ್ ಎಬಿಲಿಟಿ  ( ಚಾಣಕ್ಯ ಪ್ರಕಾಶನ)
೪. ಅಮೂಲ್ಯ ಗಣಿತ - ಸಿದ್ಧೇಶ್ವರ ಪ್ರಕಾಶನ
೫. General Mental ability - P.S.Agarwal 


General Knowledge

೧. 8, 9, 10 D.S.E.R.T. Text books
೨. N.C.E.R.T Text books
೩. Manorama Year Book
೪. ಕ್ಲಾಸಿಕ್ ಇಯರ್ ಬುಕ್
೫. ವಾಸನ್ ಇಯರ್ ಬುಕ್
೬. India 2013
೭. ಕರ್ನಾಟಕ ಕೈಪಿಡಿ
೮. ಕರ್ನಾಟಕ ವಿಶ್ವಕೋಶ ಭಾಗ-೧ (  ಮೈಸೂರು ವಿಶ್ವವಿದ್ಯಾಲಯ)
೯. ಕರ್ನಾಟಕ ವಿಶ್ವಕೋಶ ಭಾಗ -೨ ( ಮೈಸೂರು ವಿಶ್ವವಿದ್ಯಾಲಯ)
೧೦. ಸಮಕಾಲೀನ ಜಗತ್ತು - ಎಲ್. ಎನ್. ಶಿವರುದ್ರಸ್ವಾಮಿ
೧೧. ಭಾರತೀಯ ಪ್ರವಾಸೋದ್ಯಮ - ಎಚ್.ಎಸ್. ಶಿವರುದ್ರಸ್ವಾಮಿ
೧೨. ಕರ್ನಾಟಕ ಪ್ರವಾಸಿ ತಾಣಗಳು - ಶೇಶುನಾಥನ್

ಪತ್ರಿಕೆಗಳು
೧. The Hindu
೨. ವಿಜಯವಾಣಿ - ೬,೭ ಪುಟಗಳು
೩. ಕನ್ನಡ ಪ್ರಭ
೪. ಪ್ರಜಾವಾಣಿ
೫. Indian Express
೬. Wizard or Chronical
೭. ಸ್ಪರ್ಧಾ ಚಾಣಕ್ಯ/ ದಿಕ್ಸೂಚಿ

ಇಂಗ್ಲೀಷ್

೧. ಕನ್ನಡ-ಇಂಗ್ಲೀಷ್ ವ್ಯಾಕರಣ - ರಂಗಸ್ವಾಮಿ ಬೆಳಕವಾಡಿ
೨. Veta ನೋಟ್ಸ್
೩. ಭಾಷಾಂತರ ಪಾಠಮಾಲೆ ೧, ೨, ೩ (ಬೆಳಗಾವಿ ಪ್ರಕಾಶನ)
೪. ಇಂಗ್ಲೀಷ್-ಕನ್ನಡ ಡಿಕ್ಷನರಿ - ಮೈಸೂರು ವಿಶ್ವವಿದ್ಯಾಲಯ
೫. ಕ್ವಿಕ್ ಮ್ಯಾಥೆಮೆಟಿಕ್ಸ್ - ಕಿರಣ ಪಬ್ಲಿಕೇಷನ್
೬. Practical English Grammar - Gupta
೭. Applied English Grammar - R.L.Bhatia

ಪ್ರಬಂಧ
ಭಾರತದ ಸಾಮಾಜಿಕ ಸಮಸ್ಯೆಗಳು - ಚ.ನ. ಶಂಕರರಾವ್ ಅಥವಾ ಕೆ. ಭೈರಪ್ಪ
ಪರಿಸರ ಅಧ್ಯಯನ  (ಸ್ವಪ್ನ ಪ್ರಕಾಶನ)
ಕನ್ನಡ ವ್ಯಾಕರಣ - ಅರಳಿಗುಪ್ಪಿ
ಕನ್ನಡ ಸಾಹಿತ್ಯ ಕೋಶ - ರಾಜಪ್ಪ ದಳವಾಯಿ

                                                From Guruprasad S Hattigoudar
                                                                Jnanamukhi

ನಿಮ್ಮಲ್ಲೂ `ಸುಧಾ' ಇದ್ದಾಳೆ

ನಿಮ್ಮಲ್ಲೂ `ಸುಧಾ' ಇದ್ದಾಳೆ

ಮೂಲ ಲೇಖನ : ಶ್ರೀ ಎನ್.ಎಂ.ಬಿರಾದಾರ
                ಸಂಸ್ಥಾಪಕರು ಮತ್ತು ಮುಖ್ಯಸ್ಥರು
                ಚಾಣಕ್ಯ ಕರಿಯರ್ ಅಕಾಡೆಮಿ ಬಿಜಾಪುರ (ಕರ್ನಾಟಕ)
    ಜೀವನದ ಹೋರಾಟದಲ್ಲಿ ಅಪಮಾನ, ನಿಂದನೆ, ಹಿನ್ನಡೆ, ಸೋಲು ಹಾಗೂ ಜಿಗುಪ್ಸೆ ಇರುವವು. ಇವು ಇರದಿದ್ದರೆ, ಜೀವನ ನೀರಸವಾಗುತ್ತದೆ. ಇವುಗಳನ್ನು ನೀವು ಜೀವನದಲ್ಲಿ ನೀವು ಯಾವ ರೀತಿ ಸ್ವೀಕರಿಸುತ್ತಿರೋ ಎಂಬುವುದು ಮುಖ್ಯ. ಇವುಗಳಿಂದ ಕೆಲವರು ಮನ ನೊಂದುಕೊಂಡು, ಸ್ಪರ್ಧೆಯಿಂದ ಓಡಿ ಹೋಗುತ್ತಾರೆ. ಇನ್ನೂ ಕೆಲವರು ತಮ್ಮ ಸಾಮರ್ಥ್ಯವನು ಹಿಯಾಳಿಸಿದವರಿಗೆ ತೋರಿಸಿ ಕೊಡುವದಕ್ಕೆ ಇನ್ನಷ್ಟು ಶಕ್ತಿಯೊಂದಿಗೆ ಹೆಜ್ಜೆ ಹಾಕುತ್ತಾರೆ. ಇದಕ್ಕೆ ಉದಾಹರಣೆ `ಸುಧಾ' ಎಂಬ ಹುಡುಗಿಯ ಛಲದಿಂದ ಕೂಡಿದ ಜೀವನವನ್ನು ನಿಮಗೆ ಪರಿಚಯಿಸುತ್ತೇನೆ.

 `ಸುಧಾ' ಬೆಳಗಾವಿ ಜಿಲ್ಲೆಯ ಅಥಣಿಯ ತಾಲೂಕಿನ ಒಂದು ಸಣ್ಣ ಗ್ರಾಮದವಳು. ಇವಳು ೪ ನೇ ತರಗತಿಯಲ್ಲಿ ಇದ್ದಾಗಲೇ ಮಾವನೊಂದಿಗೆ ಹಿರಿಯರು ಹೆಸರು ಇಟ್ಟರು. ಅವನು ಆಗ ೮ನೇ ತರಗತಿಯಲ್ಲಿ ಓದುತ್ತಿದ್ದ. ಸುಧಾಳಿಗೆ ಅದರ ಅರಿವೆ ಇರಲಿಲ್ಲ. ಅದು ವಯಸ್ಸು ಕೂಡ ಅಲ್ಲ ಬಿಡಿ. ಶಾಲೆಯಲ್ಲಿ ಚುರುಕಾಗಿದ್ದ ಸುಧಾ ಹಂತ ಹಂತವಾಗಿ ಉತ್ತಮ ದರ್ಜೆಯಲ್ಲಿ ಪಾಸಾಗುತ್ತಾ ಪಿ.ಯು.ಸಿ ಮುಗಿಸಿದಳು. ಅವಳು ಹೈಸ್ಕೂಲಿಗೆ ಬಂದಾಗ ಮಾವನೊಂದಿಗೆ ಹೆಸರು ಕೇಳಿ ಎಲ್ಲಾ ಹುಡುಗಿಯರಂತೆ ನಾಚಿಕೆಯೊಂದಿಗೆ, ಮಾವನ ಬಗ್ಗೆ ತನ್ನದೆಯಾದ ಕನಸು ಕಂಡಳು. ಮನ್ಯಲ್ಲಿ ಯಾರು ಇಲ್ಲದಿದ್ದಾಗ, ಇಬ್ಬರೇ ಗಂಟೆಗಟ್ಟಲೇ  ಮಾತಾಡುತ್ತಿದ್ದರು. ತನ್ನದೆಯಾದ ಲೋಕದಲ್ಲಿ ವಿಹರಿಸುತ್ತಿದ್ದಳು. ಅವನು ಡಿಗ್ರಿ ಮುಗಿಸಿ ವ್ಯಾಪಾರ ಮಾಡಲು ಆರಂಭಿಸಿದನು. ಈ ಕಡೆ ಇವಳು ಬಿ.ಇಡಿ ಕಲಿಯಲು ತನ್ನ ಚಿಕ್ಕಮ್ಮನ ಮಗಳಾದ ಸವಿತಾಳೊಂದಿಗೆ ಹಾರೂಗೇರಿ ಕಾಲೇಜಿಗೆ ಸೇರಿದಳು. ಬಿ.ಇಡಿ. ಫಲಿತಾಂಶ ಬಂದಾಗ ಸುಧಳಿಗೆ ಆಘಾತವಾಗಿತ್ತು. ಅವಳು ಶೇಕಡಾ ೭೦ ಅಂಕಗಳೊಂದಿಗೆ ಪಾಸಾಗಿದ್ದರೆ, ಶೇಕಡಾ ೮೯ ಅಂಕಗಳೊಂದಿಗೆ ಸವಿತಾ ಕಾಲೇಜಿಗೆ ಪ್ರಥಮ ಬಂದಿದ್ದಳು. ಈ ಫಲಿತಾಂಶವು ಸುಧಾಳ ಜೀವನದಲ್ಲಿ ಬಿರುಗಾಳಿಯನು ಉಂಟು ಮಾಡಿತು. ಅವಳು ಯಾರೊಂದಿಗೆ ಮದುವೆ ಕನಸು ಕಂಡಿದ್ದಾಳೋ ಅವನು ಇವಳನ್ನು ನಿರಾಕರಿಸಲು ಆರಂಭಿಸಿದನು. ಇದಕ್ಕೆ ಕಾರಣ ಇವಳದು ಪರ್ಸೆಂಟೇಜ್ ಕಡಿಮೆಯಾಗಿದೆ. ನೌಕಾರಿ ಆಗುವುದಿಲ್ಲವೆಂಬ ಭಾವನೆ ಬೆಳೆಸಿಕೊಂಡನು. ಅವನು ಒಂದು ದಿನ ಸಂಬಂಧಿಕರೆಲ್ಲರನ್ನು ಕೂಡಿಸಿ ನಾನು ಮದುವೆಯಾಗುವುದಿದ್ದರೆ, ಸವಿತಾಳನ್ನು. ನೀವು ಇದಕ್ಕೆ ಒಪ್ಪದಿದ್ದರೆ ಹೊರಗಿನ ಹುಡುಗಿಯನ್ನು ಮದುವೆಯಾಗುತ್ತೇನೆಂದು ನಿರ್ಧಾರ ಹೇಳಿದನು. ಆಗ ಹಿರಿಯರು ತುಪ್ಪ ಎಲ್ಲಿ ಚೆಲ್ಲಿತು ಎಂದರೆ ಕಿಚಡಿಯಲ್ಲಿ ಎಂದು, ಅವನ ನಿರ್ಧಾರಕ್ಕೆ ಒಪ್ಪಿಗೆ ನೀಡದರು. ಆಗ ಹಿರಿಯರು ಸುಧಾಳಿಗೆ ಒಂದು ಮಾತು ಕೇಳಲಿಲ್ಲ. ಅವಳಿಗೆ ತುಂಬಾ ದುಃಖವಾಯಿತು. ಒಂದು ದಿನ ತಾಯಿಯನ್ನು ಕೇಳಿದಾಗ, ನಾವೇನು ಮಾಡಲು ಸಾಧ್ಯವಿದೆ. ನಿನಗೆ ಓದಿ ಹೆಚ್ಚಿನ ಫಲಿತಾಂಶ ಪಡೆಯಲು ಏನು ಕಷ್ಟವಾಗಿತ್ತು ಎಂದು ಹಿಯಾಳಿಸಿದರು. ಬಂಗಾರದಂಥ ಸಂಬಂಧ ನಿನ್ನಿಂದ ಬಿಡಬೇಕಾಯಿತು. ದರಿದ್ರಳಾದ ನಿನ್ನನ್ನು ಯಾರು ಮದುವೆಯಾಗುತ್ತಾರೊ, ಯಾರು ಜೋಡಿಯಾದಾರೂ ಆಘಾತವಾಗುತ್ತದೆ ಎಂದು ಅಸಹ್ಯ ಮಾತುಗಳನ್ನಾಡಿದರು.

        ಸುಧಾ ಹಾಗೂ ಸವಿತಾ ಇಬ್ಬರೂ ಕೂಡಿಕೊಂಡು ಕೋಚಿಂಗ್ ಬಂದರು. ಕೋಚಿಂಗ್‍ನಲ್ಲಿದ್ದಾಗಲೇ ಸವಿತಾಳ ಮದುವೆ ನಡೆಯಿತು. ಮದುವೆ ನಡೆದ ದಿನವೇ `ಸುಧಾ' ನನ್ನ ಹತ್ತಿರ ಬಂದಿದ್ದಳು. ಸರ್, ಇವತ್ತೂ ನಮ್ಮ ಚಿಕ್ಕಮ್ಮನ ಮಗಳ ಮದುವೆ ಇದೆ. ನಾನು ಹೋಗಲಿಲ್ಲ. ನನಗೆ ಧೈರ್ಯ ಹೇಳಿ ಎಂದಾಗ, ನಾನು ಯಾಕೆ ಹೋಗಲಿಲ್ಲ? ಎಂದಾಗ, ಮೇಲಿನ ತನ್ನ ವೃತ್ತಾಂತವನ್ನು ಹೇಳಿದಳು. ಆಯಿತು, ಈಗೇನು ಮಾಡಬೇಕು ಎಂದು ಮಾಡಿದ್ದೀ ಎಂದಾಗ, ಅವನು ನನ್ನದು ನೌಕರಿಯಾಗುವುದಿಲ್ಲ ಎಂದು ತಿಳಿದುಕೊಂಡಿದ್ದಾನಲ್ಲ. ಅವನ ಎದುರಿಗೆ ನೌಕರಿ ಮಾಡಬೇಕು ಎಂದು ಅಳಲು ಪ್ರಾರಂಭಿಸಿದಳು. ನಂತರ ಸಾವರಿಸಿಕೊಂಡು ಸರ್, ನಿಮ್ಮ ವ್ಯಕ್ತಿತ್ವ ತರಗತಿ ನನ್ನ ಜೀವನಕ್ಕೆ ಹೊಸ ತಿರುವು ನೀಡಿತು. ನೀವು ಒಂದು ದಿನ ಹೇಳಿದ ಮಾತು ಇವತ್ತಿಗೂ ಕೂಡಾ ನನಗೆ ಸ್ಫೂರ್ತಿಯಾಗಿದೆ. ನಮಗೆ ಅಂಥವರಿಗೆ ನಿಂದನೆ ಮಾಡಿದವರಿಗೆ ನಮ್ಮ ಚಪ್ಪಲಿಯಿಂದ ಉತ್ತರಿಸಬಾರದು. ನಮ್ಮ ಸಾಧನೆಯ ಮೂಲಕ ಉತ್ತರಿಸಬೇಕು ಎಂಬ ಮಾತು ಬಹಳಷ್ಟು ಸ್ಫೂರ್ತಿ ನೀಡಿತು. ನನು ನೌಕರಿಯಾಗದೇ ಊರಿಗೆ ಹೋಗುವುದಿಲ್ಲ ಸರ್, ನನಗೆ ಸಹಾಯ ಮಾಡಿ ಎಂದಳೂ. ಕೋಚಿಂಗ್ ಮುಗಿದ ನಂತರ ಕೂಡಾ ಅವಳು ಬಿಜಾಪುರದಲ್ಲಿ ಇದ್ದು ಓದಲು ಆರಂಭಿಸಿದಳು. ಅವಳ ಪರೀಕ್ಷೆ ಮುಗಿಯುವವರೆಗೆ ಊಟದ ಹಾಗೂ ರೂಮ್ ವ್ಯವಸ್ಥೆ ಮಾಡಿಕೊಟ್ಟೆನು.

        ಮೊನ್ನೆ ಬಂದ ಹೈಸ್ಕೂಲ್ ಫಲಿತಾಂಶದಲ್ಲಿ ಸುಧಾ ಆಯ್ಕೆಯಾಗಿದ್ದಳು. ಸವಿತಾ ೨ ಅಂಕಗಳಿಂದ ಹೊರಗೆ ಉಳಿದಳು. ಸುಧಾ ಛಲ ನೋಡಿ ನನಗೆ ಖುಷಿಯಾಯಿತು. ಸುಧಾಳ ಜಾಗದಲ್ಲಿ ಬೇರೆ ಯಾರಾದರೂ ಇದ್ದರೆ ಅವರ ಚಿಂತೆ ಮಾಡುತಾ, ಅಳುತ್ತಾ, ಜಿಗುಪ್ಸೆ ಪಡುತ್ತಾ ಜೀವನ ಕಳೆಯುತ್ತಿದ್ದಳು. ಸುಧಾಳ ಮಾವನಿಗೆ ಯಾವ ರೀತಿಯಾಗಿರಬೇಕು ಎಂದು ನೀವೇ ಊಹಿಸಿ.

ಕೊನೆಯ ಮಾತು: ಜೀವನದಲ್ಲಿ ಏನೇ ಘಟಿಸಲಿ, ನಿಮ್ಮ ನಂಬಿಕೆ ಆತ್ಮವಿಶ್ವಾಸ ಹಾಗೂ ಛಲವನ್ನು  ಯಾವುದೇ ಕಾರಣಕ್ಕೂ ಕಳೆದುಕೊಳ್ಳಬೇಡಿ.

ಕೆ.ಎ.ಎಸ್. ಪೂರ್ವಭಾವಿ ಪರೀಕ್ಷೆ 2013 ಸಿದ್ಧತಾ ಮಾಹಿತಿ

ಕರ್ನಾಟಕ ಲೋಕ ಸೇವಾ ಆಯೋಗ (ಕೆ.ಪಿ.ಎಸ್.ಸಿ.)ಯು ಗೆಜೆಟೆಡ್ ಪ್ರೊಬೇಷನರಿ ಹುದ್ದೆಗಳ ನೇಮಕಾತಿ ಮಾಡಿಕೊಳ್ಳುತ್ತಿದೆ. ಈ ಹುದ್ದೆಗಳ ಭರ್ತಿಗಾಗಿ ಸ್ಪರ್ಧಾತ್ಮಕ ಪರೀಕ್ಷೆಯನ್ನು ಏರ್ಪಡಿಸಲಾಗುತ್ತಿದೆ. ಪದವಿ ಹೊಂದಿದ ಅಭ್ಯರ್ಥಿಗಳು ಕೆ.ಎ.ಎಸ್. ಹುದ್ದೆಗೆ ಅರ್ಜಿಯನ್ನು ಸಲ್ಲಿಸಬಹುದು. ಕೆ.ಎ.ಎಸ್. ಕುರಿತಾಗಿ ಹಲವಾರು ಜನರು ನನಗೆ ಆಗಾಗ ಇ-ಮೇಲ್ ಮೂಲಕ, ಎಸ್.ಎಂ.ಎಸ್. ಮೂಲಕ ಮಾಹಿತಿ ಕೇಳುತ್ತಿರುತ್ತಾರೆ. ಅವರಿಗೆಲ್ಲ ಉಪಯುಕ್ತವಾಗಲೆಂದು ಕೆ.ಎ.ಎಸ್. ಪರೀಕ್ಷೆ ಕುರಿತಾದ ಮಾಹಿತಿಯನ್ನು ಸಂಗ್ರಹಿಸಿ ಇಲ್ಲಿ ನೀಡಲು ಪ್ರಯತ್ನಿಸುತ್ತಿದ್ದೇನೆ.

ಕೆ.ಎ.ಎಸ್. ಪೂರ್ವಭಾವಿ ಪರೀಕ್ಷೆ 2013 ಸಿದ್ಧತಾ ಮಾಹಿತಿ

ಕೆ.ಎ.ಎಸ್. ಪರೀಕ್ಷೆಗೆ ಅರ್ಹತೆ :

 ಕರ್ನಾಟಕ ಲೋಕಸೇವಾ ಆಯೋಗ ನಡೆಸುವ ಕೆ.ಎ.ಎಸ್. ಪರೀಕ್ಷೆಗೆ ಅಂಗೀಕೃತ ವಿಶ್ವವಿದ್ಯಾಲಯದಿಂದ ಯಾವುದೇ ಪದವಿ ಹೊಂದಿದ ಅಭ್ಯರ್ಥಿಗಳು ಅರ್ಜಿಯನ್ನು ಸಲ್ಲಿಸಬಹುದು. ಅಭ್ಯರ್ಥಿಗಳು ಭಾರತೀಯ ನಾಗರಿಕತ್ವವನ್ನು ಪಡೆದಿರಬೇಕು.

ಪರೀಕ್ಷೆಯ ಹಂತಗಳು :
 ಕೆ.ಎ.ಎಸ್. ನೇಮಕಾತಿ ಪರೀಕ್ಷೆಯು ಮೂರು ಹಂತದಲ್ಲಿ ನಡೆಯುತ್ತದೆ.
೧. ಪೂರ್ವಭಾವಿ ಪರೀಕ್ಷೆ
೨. ಮುಖ್ಯ ಪರೀಕ್ಷೆ
೩. ಸಂದರ್ಶನ

ಪೂರ್ವಭಾವಿ ಪರೀಕ್ಷೆ : -
* ಪೂರ್ವಭಾವಿ ಪರೀಕ್ಷೆಯು ಎರಡು ಪತ್ರಿಕೆಗಳನ್ನು ಒಳಗೊಂಡಿರುತ್ತದೆ.
* ಪ್ರಶ್ನೆಪತ್ರಿಕೆಯು ವಸ್ತುನಿಷ್ಠ ಮಾದರಿಯಲ್ಲಿ ಇರುತ್ತದೆ.
* ಪ್ರಶ್ನೆಗಳು ಇಂಗ್ಲೀಷ್ ಮತ್ತು ಕನ್ನಡದಲ್ಲಿ ಇರುತ್ತವೆ.
* ತಲಾ ಪತ್ರಿಕೆಗಳು ೧೦೦ ಪ್ರಶ್ನೆಗಳನ್ನು ಹೊಂದಿರುತ್ತವೆ. ಪ್ರತಿ ಪ್ರಶ್ನೆಗೆ ೨ ಅಂಕಗಳಿರುತ್ತವೆ.


                                                            ಪೇಪರ್ -1
ವಿಷಯ                                        ಪ್ರಶ್ನೆಗಳು             ಅಂಕಗಳು
ರಾಷ್ಟ್ರೀಯ ಹಾಗೂ
ಅಂತರ್‌ರಾಷ್ಟ್ರೀಯ ಪ್ರಾಮುಖ್ಯತೆ         40                     80
ಮಾನವಿಕ ಶಾಸ್ತ್ರ                              60                    120
ಒಟ್ಟು                                              100                   200

                                                               ಪೇಪರ್ -2
ರಾಜ್ಯದ ಪ್ರಾಮುಖ್ಯತೆ                          40                      80
ವಿಜ್ಞಾನ ತಂತ್ರಜ್ಞಾನದ ಪರಿಸರ
ಮತ್ತು ಪರಿಸರ ಶಾಸ್ತ್ರ                           30                      60
ಸಾಮಾನ್ಯ ಮಾನಸಿಕ ಸಾಮರ್ಥ್ಯ           30                      60
ಒಟ್ಟು                                                100                     200


ಪೇಪರ್ 1 ಪಠ್ಯಕ್ರಮ

 ಪ್ರಥಮ ಪತ್ರಿಕೆ ಸಾಮಾನ್ಯ ಪದವೀಧರರಿಗೆ ಅನುಕೂಲವಾಗುವ ರೀತಿಯಲ್ಲಿ ಪಠ್ಯ ಇರುವುದು. ಇಲ್ಲಿಯ ವಿಷಯಗಳು ಹೆಚ್ಚು ವಿಸ್ತಾರವಾಗಿದ್ದು ಮತ್ತು ಅಳತೆಯಿಂದ ಕೂಡಿದೆ. ಇದು ಎರಡು ಭಾಗಗಳಿಂದ ಕೂಡಿದೆ.

ಭಾಗ - ಎ) ಈ ಭಾಗದಲ್ಲಿ ರಾಷ್ಟ್ರೀಯ ಮತ್ತು ಅಂತರ್‌ರಾಷ್ಟ್ರೀಯ ಘಟನೆಗಳು ಇರುವುವು.
೧. ರಾಷ್ಟ್ರದಲ್ಲಿ ನಡೆದ ಪ್ರಮುಖ ರಾಜಕೀಯ ಘಟನೆಗಳು
೨. ಸಾಮಾಜಿಕ ಮತ್ತು ಆರ್ಥಿಕ ಚಟುವಟಿಕೆಗಳು
೩. ಪ್ರಸಿದ್ಧಿ ಪಡೆದ ಸ್ಥಳಗಳು
೪. ಪ್ರಸಿದ್ಧವಾದ ಪ್ರಶಸ್ತಿಗಳು ಮತ್ತು ವ್ಯಕ್ತಿಗಳ ವಿವರಗಳು
೫. ವೈದ್ಯಕೀಯ ಆರೋಗ್ಯ ಹಾಗೂ ಪರಿಸರ ಸಂಬಂಧಪಟ್ಟ ವಿಚಾರಗಳು
೬. ಕ್ರ್‍ಈಡೆಗಳಿಗೆ ಸಂಬಂಧಪಟ್ಟ ವಿಚಾರಗಳು
೭. ದ್ವಿಪಕ್ಷೀಯ ಒಪ್ಪಂದಗಳು
೮. ಜಾಗತಿಕ ಸಂಘಟನೆಗಳು, ಸಮ್ಮೇಳನಗಳು, ಒಪ್ಪಂದಗಳು
೯. ರಾಷ್ಟ್ರ ರಾಷ್ಟ್ರಗಳ ಮಧ್ಯೆ ನಡೆಯುವ ರಾಜಕೀಯ ವಿಚಾರಗಳು
೧೦. ಜಾಗತಿಕ, ಆರ್ಥಿಕ, ಪರಿಸರ ಹಾಗೂ ಜೈವಿಕ ವಿಷಯಗಳು
೧೧. ರಾಷ್ಟ್ರದ ಪ್ರಮುಖ ನೇಮಕಗಳು
೧೨. ಸುಪ್ರೀಂ ಕೋರ್ಟಿನ ಪ್ರಮುಖ ತೀರ್ಪುಗಳು


ಭಾಗ - ಬಿ

 ಇದು ಶೈಕ್ಷಣಿಕ ವಿಷಯಗಳಿಗೆ ಸಂಬಂಧಪಟ್ಟಿದೆ. ಬಹಳಷ್ಟು ವಿದ್ಯಾರ್ಥಿಗಳು ಇದು ಮನೋವಿಜ್ಞಾನಕ್ಕೆ ಸಂಬಂಧಪಟ್ಟಿದೆ ಎಂದು ತಿಳಿದುಕೊಂಡಿರುತ್ತಾರೆ. ಈ ಭಾಗದಲ್ಲಿ ಈ ಕೆಳಗಿನ ವಿಷಯಗಳು ಒಳಗೊಂಡಿವೆ.
೧) ಪ್ರಾಚೀನ ಭಾರತದ ಇತಿಹಾಸ
೨) ಮಧ್ಯಕಾಲೀನ ಭಾರತದ ಇತಿಹಾಸ
೩) ಆಧುನಿಕ ಭಾರತದ ಇತಿಹಾಸ
೪) ಕರ್ನಾಟಕ ಇತಿಹಾಸ, ಭಾರತದ ಸಂವಿಧಾನ ಮತ್ತು ರಾಜಕೀಯ
೫) ಭಾರತದ ಆರ್ಥಿಕಾಭಿವೃದ್ಧಿ
೬) ಭಾರತ ಭೂಗೋಳ
೭) ಪ್ರಾಕೃತಿಕ ಭೂಗೋಳ
೮) ಪ್ರಪಂಚದ ಭೂಗೋಳ
೯) ಕರ್ನಾಟಕ ಅರ್ಥಶಾಸ್ತ್ರ
೧೦) ಕರ್ನಾಟಕ ಭೂಗೋಳ
೧೧) ಕರ್ನಾಟಕ ರಾಜಕೀಯ


                                         ಪೇಪರ್ -2

ಭಾಗ -ಎ)
  ರಾಜ್ಯದ ಪ್ರಚಲಿತ ಘಟನೆಗಳು ಹಾಗೂ ರಾಜ್ಯ ಸರ್ಕಾರದ ಕಾರ್ಯಕ್ರಮಗಳು ಇರುವುವು. ಕೆಳಗಿನ ವಿಷಯಗಳಿಗೆ ಹೆಚ್ಚು ಗಮನ ನೀಡಬೇಕು.
೧) ರಾಜ್ಯದಲ್ಲಿರುವ ಪ್ರಚಲಿತ ಘಟನೆಗಳು
೨) ರಾಜ್ಯದಲ್ಲಿನ ಪ್ರಚಲಿತ ಸ್ಥಳಗಳು
೩) ರಾಜ್ಯದಲ್ಲಿನ ಪ್ರಸಿದ್ಧವಾದ ಪ್ರಶಸ್ತಿಗಳು ಮತ್ತು ಅದರ ವಿವರಗಳು
೪) ರಾಜ್ಯದಲ್ಲಿ ಇಲ್ಲಿಯವರೆಗೆ ಜಾರಿಗೆ ಬಂದಿರುವ ಸಾಮಾಜಿಕ ಹಾಗೂ ಆರ್ಥಿಕ ಕಾರ್ಯಕ್ರಮಗಳ ವಿವರಣೆ ಗೊತ್ತಿರಬೇಕು.
೫) ರಾಜ್ಯಕ್ಕೆ ಸಂಬಂಧಪಟ್ಟ ಪ್ರಮುಖ ನೇಮಕಗಳು
೬) ರಾಜ್ಯಕ್ಕೆ ಸಂಬಂಧಪಟ್ಟ ಹೈಕೋರ್ಟ್ ಹಾಗೂ ಸುಪ್ರೀಂ ಕೋರ್ಟ್ ತೀರ್ಪುಗಳು
೭) ಕನ್ನಡಿಗರ ರಾಷ್ಟ್ರ ಮತ್ತು ಅಂತರ್‌ರಾಷ್ಟ್ರೀಯ ಮಟ್ಟದ ಸಾಧನೆ

ಭಾಗ - ಬಿ ) ಇದರಲ್ಲಿ ಸಾಮಾನ್ಯ ವಿಜ್ಞಾನ ಹಾಗೂ ಪರಿಸರ ವಿಜ್ಞಾನಕ್ಕೆ ಸಂಬಂಧಪಟ್ಟ ಪ್ರಶ್ನೆಗಳು ಇರುವುವು.
೧) ಭೌತಶಾಸ್ತ್ರ
೨) ರಸಾಯನಶಾಸ್ತ್ರ
೩) ಜೀವಶಾಸ್ತ್ರ
೪) ಕಂಪ್ಯೂಟರ್
೫) ತಂತ್ರಜ್ಞಾನ

ಭಾಗ -೩

೧) General Mental Ability  :
  ಲಾಭ ಮತ್ತು ನಷ್ಟ ಬಡ್ಡಿ ಪಾಲುಗಾರಿಕೆ, ಕೆಲಸ ಮತ್ತು ಸಮಯ, ಸಮಯ ಮತ್ತು ರೂ, ರೈಲ್ವೆ ಸಮಸ್ಯೆಗಳು, ಕ್ಯಾಲೆಂಡರ್ ಪ್ರೊಬಬಿಲಿಟಿ ಕ್ಯೂಲ್, ಚಿತ್ರಗಳು)

೨) Analytic Ability :
   ಸರಣಿ, ಸಂಬಂಧಿಕಗಳು, ವರ್ಗೀಕರಣ, ಕೋಡಿಂಗ್-ಡಿ-ಕೋಡಿಂಗ್, ರಕ್ತ ಸಂಬಂಧಗಳು, ದಿಕ್ಕುಗಳು, ಸ್ಥಾನಗಳು, ಹೊಂದಾಣಿಕೆ, ರ್‍ಯಾಂಕ್, ಅಕ್ಷರಮಾಲೆ ಸಮಸ್ಯೆಗಳು, ವೆನ್ ನಕ್ಷೆಗಳು, ಪಜಲ್ ಪರೀಕ್ಷೆ, ಹೇಳಿಕೆಗಳು ಮತ್ತು ಕಾರಣಗಳು)

೩. Basic Numeracy :
  ( ಸಂಖ್ಯಾ ಪದ್ಧತಿ, ಲ.ಸಾ.ಅ., ಮ.ಸಾ.ಅ, ಸರಳೀಕರಣ, ಪ್ರತಿಶತ ಕಂಡು ಹಿಡಿಯುವುದು, ಅನುಪಾತ, ಸರಾಸರಿ )

೪. Logical Reasoning  :
 ಹೇಳೀಕೆಗಳು ಮತ್ತು ನಿರ್ಣಯಗಳು, ಹೇಳಿಕೆಗಳು ಮತ್ತು ವಾದಗಳು, ಹೇಳಿಕೆಗಳು ಮತ್ತು ಊಹೆಗಳು, ಹೇಳಿಕೆಗಳು ಮತ್ತು ಕ್ರಿಯೆಗಳು, ಕಾರಣಗಳು ಮತ್ತು ಪರಿಣಾಮಗಳು, ಪರಿಸ್ಥಿತಿಯ ವಿಶ್ಲೇಷಣೆ)

೫. Data Interpretation :
        (ಟೇಬಲ್ ಚಾರ್ಟ್, ಬಾರ್ ಚಾರ್ಟ್ / ಗ್ರಾಫ್ಸ್, ಪೈ ಚಾರ್ಟ್, ಮಾಹಿತಿ ಅರ್ಥೈಸುವಿಕೆ )


ಈ ಪರೀಕ್ಷೆಯ ತಯಾರಿಗಾಗಿ ಅಭ್ಯರ್ಥಿಯಲ್ಲಿ ಈ ಕೆಳಗಿನ ಗುಣಗಳು ಇರಬೇಕು.

* ಕೆ.ಎ.ಎಸ್. ಅಧಿಕಾರಿಯಾಬೇಕೆಂಬ ಬಲವಾದ ಆಸಕ್ತಿ ಇರಬೇಕು. ಏನೋ ಒಂದು ಕೈ ನೋಡುತ್ತೇನೆಂಬ ಭಾವನೆ ಇರಬಾರದು. ನೂರಕ್ಕೆ ನೂರರಷ್ಟು ಉತ್ಸಾಹ ಹಾಗೂ ಛಲ ಇರಬೇಕು.

* ಪರೀಕ್ಷೆ ತಯಾರಿ ಮಾಡುವುದು ಬೇರೆ. ಅದರಲ್ಲಿ ಇಳಿಯುವುದು ಬೇರೆ. ಇಲ್ಲಿ ಪರೀಕ್ಷೆಗಾಗಿ ಆಳವಾದ ಅಧ್ಯಯನ ಮಾಡಬೇಕು. ಸಮುದ್ರ ಮೇಲ್ಗಡೆ ತೆರೆಗಳು ಹೆಚ್ಚಾಗಿ ಇರುವುವು. ಆದರೆ ಒಳಗೆ ಹೋದಂತೆ ಅಲ್ಲಿ ಪ್ರಶಾಂತತೆ ಇರುವುದು. ಅದೇ ರೀತಿ ಮೇಲ್ನೋಟಕ್ಕೆ ತಯಾರಿ ನಡೆಸಿದಾಗ ಮೈಂಡ್ ಡಿಸ್ಟರ್ಬ್ ಜಾಸ್ತಿ ಇರುವುದು. ಅದರಲ್ಲಿ ಆಳವಾಗಿ ತೊಡಗಿದಾಗ ನಮ್ಮ ಓದಿಗೆ ಡಿಸ್ಟರ್ಬ್ ಕಡಿಮೆಯಾಗುವುದು.

* ಪರೀಕ್ಷೆಗಾಗಿ ನಿಮ್ಮನ್ನು ಸಂಪೂರ್ಣವಾಗಿ ತೊಡಗಿಸಿಕೊಂಡಾಗ, ಅದರಿಂದ ಹೊರಗೆ ಬರಬಾರದು. ಅದನ್ನು ದೃಢತೆ ಎನ್ನುವರು. ದೃಢವಾದ ಮನಸ್ಸು ಇಟ್ಟು ತಯಾರಿ ನಡೆಸಬೇಕು. ಕೆಲವರು ಕೆ.ಎ.ಎಸ್. ಪರೀಕ್ಷೆಗಾಗಿ ಪೂರ್ಣ ತಯಾರಿ ನಡೆಸಿದ್ದಾಗ, ಇನ್ನೊಂದು ಪರೀಕ್ಷೆ ಕಾಲ್ ಫಾರ್ಂ ಆದ ಕೂಡಲೇ ಕೆ.ಎ.ಎಸ್. ಅಲ್ಲೇ ಬಿಟ್ಟು ಇನ್ನೊಂದು ಪರೀಕ್ಷೆಗೂ ತಯಾರಿ ನಡೆಸುತ್ತಾರೆ. ಅದನ್ನು ಪೂರ್ಣಗೊಳಿಸದೆ, ಮತ್ತೊಂದು ಪರೀಕ್ಷೆಗೆ ಜಿಗಿಯುತ್ತಾರೆ. ಇಂಥವರು ಯಾವ ಪರೀಕ್ಷೆಯಲ್ಲಿಯೂ ಯಶಸ್ವಿಯಾಗುವುದಿಲ್ಲ.

* ಇಂಥ ಪರೀಕ್ಷೆ ತಯಾರಿ ನಡೆಸಿದಾಗ ನಿಮ್ಮ ಮನಸ್ಸನ್ನು ಆಕರ್ಷಣೆಯಿಂದ ದೂರ ಇಡಬೇಕು. ಆಕರ್ಷಣೆಗೆ ಒಳಗಾಗಿ ಓದುತ್ತಾ ಇದ್ದಾಗ ಅಭ್ಯಾಸ ಪರಿಪೂರ್ಣವಾಗುವುದಿಲ್ಲ. ಮುಗ್ಧ ಮನಸ್ಸು ಏಕಾಗ್ರತೆಗೊಳ್ಳುವುದಿಲ್ಲ. ಯಾವುದೋ ಭಾವಲೋಕದಲ್ಲಿ ಓದುತ್ತಾ ಇರುವುವರು ಅವರು ಎಷ್ಟೇ ಗಂಟೆ ಓದಿದರೂ ಕೂಡಾ, ತಾವು ಯಾವುದು ಓದಿದ್ದು ಎಂಬುದು ಗೊತ್ತಿರುವುದಿಲ್ಲ.

* ಈ ಪರೀಕ್ಷೆಗೆ ಏಷ್ಟು ಗಂಟೆ ತಯಾರಿ ನಡೆಸಬೇಕು ಎಂಬ ಪ್ರಶ್ನೆ ಬಹಳಷ್ಟು ಅಭ್ಯರ್ಥಿಗಳ ಪ್ರಶ್ನೆಯಾಗಿದೆ. ನನ್ನ ಪ್ರಕಾರ ಕನಿಷ್ಠ ೧೨ ರಿಂದ ೧೪ ತಾಸು ಓದಬೇಕು. ಕೆಲವರಿಗೆ ಗಾಬರಿಯಾಗಬಹುದು. ಇದಕ್ಕಿಂತ ಕಡಿಮೆ ಅವಧಿಯನ್ನು ತೆಗೆದುಕೊಂಡರೆ, ವಿಷಯವನ್ನು ಪೂರ್ಣಗೊಳಿಸಲು ಸಾಧ್ಯವಿಲ್ಲವೆನೋ ಎಂದು ಕೆಲವರು ಹೇಳುವ ಪ್ರಕಾರ ಎಷ್ಟು ಗಂಟೆ ಓದುವುದು ಮುಖ್ಯವಲ್ಲ ಎಷ್ಟು ವಿಷಯ ತಿಳಿದುಕೊಂಡೆವು ಎಂಬುವುದು ಮುಖ್ಯವಾಗುತ್ತದೆ. ಆದರೆ, ಅಧ್ಯಯನಕ್ಕೆ ಕೂಡುವ ಅವಧಿ ಹೆಚ್ಚಿದಂತೆ, ಸಹಜವಾಗಿ ಏಕಾಗ್ರತೆ ಹಾಗೂ ಅರ್ಥ ಮಾಡಿಕೊಳ್ಳುವುದು.

* ಸಾಮಾನ್ಯವಾಗಿ ಯಾವ ಸಮಯದಲ್ಲಿ ಓದಬೇಕು ಎಂಬುದು ಮತ್ತೊಂದು ಪ್ರಶ್ನೆಯಾಗಿದೆ. ಇಲ್ಲಿ ಯಾವ ಸಮಯದಲ್ಲಿ ಓದುತ್ತೇನೆ ಎಂಬುದು ಮುಖ್ಯವಲ್ಲ. ಯಾವುದೇ ಸಮಯದಲ್ಲಿ ಓದಿ ಆದರೆ, ಮನಸ್ಸು ಕೊಟ್ಟು ಅಧ್ಯಯನ ಮಾಡಿ. ಸಾಮಾನ್ಯವಾಗಿ ಇಂಥ ಪರೀಕ್ಷೆಗೆ ತಯಾರಿ ನಡೆಸುವವರು ರಾತ್ರಿಯೇ ಹೆಚ್ಚು ಅಧ್ಯಯನ ಮಾಡುತ್ತಾರೆ.

* ಈ ಪರೀಕ್ಷೆಗೆ ವಿಶೇಷ ತಯಾರಿ ಹಾಗೂ ಪರಿಶ್ರಮ ಬೇಕಾಗುವುದು. ಅದಕ್ಕಾಗಿ ಸಹನೆ ಇರಬೇಕು. ನಿರಂತರ ಓದುತ್ತಾ ಇದ್ದಾಗ, ಅದನ್ನು ಬಿಟ್ಟು ಓಡಿಹೋಗೋಣ ಎಂಬ ಮನಸ್ಸು ಬರುತ್ತದೆ. ಕೆಲವರು ೧೧ನೇ  ಹೆಜ್ಜೆವರೆಗೆ ಬಂದಿರುತ್ತಾರೆ. ಇನ್ನೊಂದು ಹೆಜ್ಜೆ ಇಟ್ಟರೆ, ಗುರಿ ಮುಟ್ಟಲು ಸಾಧ್ಯವಿರುತ್ತದೆ. ಅದನ್ನು ಗುರ್ತಿಸದೆ, ಸಹನೆ ಕಳೆದುಕೊಂಡು ಸ್ಪರ್ಧೆಯಿಂದ ಹಿಂದಕ್ಕೆ ಸರಿಯುತ್ತಾರೆ. ಓಡಿ ಹೋಗುತ್ತಾರೆ.

* ಗೆಜೆಟೆಡ್ ಪ್ರೊಬೇಷನರಿ ಪರೀಕ್ಷೆಗೆ ತಯಾರಿ ಮಾಡುವಾಗ ನಮ್ಮ ಓದು ಎಷ್ಟು ಮುಖ್ಯವಾಗಿರುತ್ತದೆ. ಅಷ್ಟೇ ಮುಖ್ಯ ನಮಗೆ ಪ್ರೇರಣೆ ಹಾಗೂ ಸ್ಫೂರ್ತಿ. ಅದಕ್ಕಾಗಿ ಈಗಾಗಲೇ ಯಶಸ್ವಿಯಾದವರ ಸಂದರ್ಶನ ಓದಿ ಹಾಗೂ ಕೆ.ಎ.ಎಸ್. ಪರೀಕ್ಷೆಗೆ ಸಂಬಂಧಪಟ್ಟ ಸೆಮಿನಾರ್‌ಗಳಲ್ಲಿ ಪಾಲ್ಗೊಳ್ಳುವುದರಿಂದ ನಿಮ್ಮ ಮನಸ್ಸು ಗಟ್ಟಿಯಾಗುತ್ತದೆ. ನಮ್ಮ ಸ್ಪರ್ಧಾ ಚಾಣಕ್ಯ ಪತ್ರಿಕೆಯಲ್ಲಿ ಪ್ರತಿ ತಿಂಗಳು ಸಾಧಕರ ಬಗ್ಗೆ ಪ್ರಕಟಿಸಿದ್ದೇವೆ. ಒಮ್ಮೆ ಓದಿ ನೋಡಿ. ಸಾಧಿಸಲು ಅವರು ತೆಗೆದುಕೊಂಡ ಸಮಯ, ಯಶಸ್ಸಿಗಾಗಿ ಪಟ್ಟ  ಪರಿಶ್ರಮ ಎಲ್ಲವೂ ಗೊತ್ತಾಗುತ್ತದೆ.

* ಓದುವಾಗ ಯಾವುದೇ ವಿಷಯ ತಿಳಿಯದಿದ್ದಾಗ ಗಾಬರಿಯಾಬೇಡಿ. ಎಲ್ಲರಿಗೂ ಎಲ್ಲಾ ವಿಷಯ ಗೊತ್ತಿರುವುದಿಲ್ಲ. ಯಾಕೆಂದರೆ ಯಾರೂ ಇಲ್ಲಿಯವರೆಗೆ ೧೦೦ಕ್ಕೆ ೧೦೦ ಅಂಕಗಳನ್ನು ತೆಗೆದುಕೊಂಡ ಉದಾಹರಣೆ ಇಲ್ಲ. ಕೆಲವರು ಒಂದೂ ಪ್ರಶ್ನೆ ಬರದಿದ್ದಾಗ ನಾನು ದಡ್ಡನೆಂಬ ಭಾವನೆ ಬೆಳೆಸಿಕೊಂಡು ಉತ್ಸಾಹ ಕಳೆದುಕೊಳ್ಳುತ್ತಾರೆ.

* ಕೆಲವರಿಗೆ ಈ ಪರೀಕ್ಷೆ ಎಂದರೆ ಪುಸ್ತಕಗಳನ್ನು ಸಂಗ್ರಹಿಸುವುದು ಎಂದು ತಿಳಿದುಕೊಂಡು ಎಲ್ಲಾ ಪುಸ್ತಕಗಳನ್ನು ಖರೀದಿಸುತ್ತಾರೆ. ಆದರೆ, ಯವುದನ್ನು ಪೂರ್ಣವಾಗಿ ಓದುವುದಿಲ್ಲ. ಉತ್ತಮ ಪುಸ್ತಕಗಳು ಇದ್ದರೆ ಸಾಕು. ಮುಂದಿನ ಸಂಚಿಕೆಯಲ್ಲಿ ಕೆ.ಎ.ಎಸ್. ಪರೀಕ್ಷೆ ತಯಾರಿಗೆ ಇರುವ ಉತ್ತಮ ಪುಸ್ತಕಗಳ ಪಟ್ಟಿಯನ್ನು ಪ್ರಕಟಿಸುತ್ತೇವೆ.

* ಉನ್ನತ ಪರೀಕ್ಷೆ ಬರೆಯಬೇಕಾದರೆ ಅಧ್ಯಯನದ ಕೊಠಡಿಯು ಕೂಡ ಅಷ್ಟೇ ಉತ್ತಮವಾಗಿರಬೇಕು. ಅಲ್ಲಿಯ ವಾತಾವರಣ ಬಹಳ ಚೆನ್ನಾಗಿರಬೇಕು. ಒಂದು ವೇಳೆ ನೀವು ಇರುವ ರೂಮಿನಲ್ಲಿ ಎಲ್ಲರೂ ಕೆ.ಎ.ಎಸ್. ಆಕಾಂಕ್ಷಿಗಳು ಇದ್ದರೆ ಚೆಂದ. ಬೇರೆ ಪರೀಕ್ಷೆಗೆ ತಯರಾಗುವವರ ಜೊತೆ ಇರಬಾರದು. ಯಾಕೆಂದರೆ, ನಿಮ್ಮದೇ ಕೆ.ಎ.ಎಸ್. ವಾತಾವರಣ ಇರುವುದಿಲ್ಲ. ಹಾಗೂ ಸ್ಫೂರ್ತಿ ಉಂಟಾಗುವುದಿಲ್ಲ.

* ಬೇರೆಯವರು ಓದುವುದನ್ನು ನೋಡಿ, ಅವರ ಪುಸ್ತಕಗಳ ಸಂಗ್ರಹ ನೋಡಿ, ಅವರ ಚರ್ಚೆಯನ್ನು ನೋಡಿ ನೀವು ಗಾಬರಿಯಾಗಬೇಡಿ. ಯಾವತ್ತೂ ಮತ್ತೊಬ್ಬರೊಂದಿಗೆ ಹೋಲಿಕೆ ಮಾಡಿಕೊಳ್ಳಬೇಡಿ. ಓದುವಾಗ ನಿಮ್ಮದೇ ಶೈಲಿ ರೂಢಿಸಿಕೊಂಡು ಓದಬೇಕು.

* ಓದುವಾಗ ಮುಖ್ಯವಾದ ವಿಷಯಗಳನ್ನು ಕುರಿತು ನಿಮ್ಮದೇ ಆದ ನೋಟ್ಸ್ ಮಾಡಿಕೊಳ್ಳುವುದು ಉತ್ತಮ. ಸಮಯ ಇರದಿದ್ದಾಗ ಮಾತ್ರ ಪುಸ್ತಕದಲ್ಲಿ ಅಂಡರಲೈನ್ ಮಾಡಿಕೊಳ್ಳಿ. ಇದರಿಂದ ವೇಗವಾಗಿ ಪುನರ್ ಅಧ್ಯಯನ ಮಾಡಲು ಹಾಗೂ ನೆನಪಿಟ್ಟುಕೊಳ್ಳಲು ಸುಲಭವಾಗುತ್ತದೆ.

* ಇದಕ್ಕಾಗಿ ಗೆಳೆಯರ ಗುಂಪು ಮಾಡಿಕೊಳ್ಳಿ. ಯಾವುದೇ ಕಾರಣಕ್ಕೂ ಏಕಾಂಗಿ ಓದಬೇಡಿ. ಗುಂಪು ಚರ್ಚೆ ಮಾಡುವಾಗ ಹೊಸ ಹೊಸ ವಿಷಯ ತಿಳಿಯುವುದು ಅಲ್ಲದೆ ಚರ್ಚೆ ಮಾಡಿದ ವಿಷಯವು ಹೆಚ್ಚು ನೆನಪಿನಲ್ಲಿ ಉಳಿಯುತ್ತದೆ.

* ಚರ್ಚೆ ಹರಟೆಯಾಗಬಾರದು. ಓದು ಆಯಾಸವಾಗಬಾರದು ಹಾಗೂ ನಿರಂತರ ಉತ್ಸಾಹ ನಿಮ್ಮಲ್ಲಿ ಇರಬೇಕಾದರೆ, ಪ್ರತಿನಿತ್ಯ ಕನಿಷ್ಠ ಅರ್ಧಗಂಟೆಯಾದರೂ ಧ್ಯಾನ, ಪ್ರಾಣಾಯಾಮ ಹಾಗೂ ಯೋಗಾಸನ ಮಾಡಬೇಕು. ಇದರಿಂದ ನಮ್ಮ ದೇಹಕ್ಕೆ ಶುದ್ಧವಾದ ಆಮ್ಲಜನಕ ಪೂರೈಕೆಯಾಗುವುದಲ್ಲದೆ, ರಕ್ತ ಪರಿಚಲನೆ ನಿಯಮಿತಗೊಳ್ಳುವುದು. ಇದರಿಂದ ಉತ್ಸಾಹ ಹೆಚ್ಚಾಗುತ್ತದೆ. ಪ್ರಾಮಾಣಿಕವಾಗಿ ನಿಮ್ಮನ್ನು ಪರೀಕ್ಷೆಯಲ್ಲಿ ತೊಡಗಿಸಿಕೊಂಡರೆ, ನಿಮ್ಮ ತಯಾರಿ ಉತ್ತಮವಾಗಿರುತ್ತದೆ. ಯಾವುದೇ ಕಾರಣಕ್ಕೂ ಉತ್ಸಾಹ ಕಳೆದುಕೊಳ್ಳದೆ, ಒಂದೇ ಮನಸ್ಸಿನಿಂದ ತಯಾರಿಯಲ್ಲಿ ತೊಡಗಿಸಿಕೊಳ್ಳಿ. ನಿಲ್ಲಬೇಡಿ, ಮುನ್ನುಗ್ಗಿರಿ, ಯಶಸ್ಸು ಸಿಗಲಿ.

* ನಿಮ್ಮದೇ ಆದ ಟೈಮ್ ಟೇಬಲ್ ಹಾಕಿಕೊಳ್ಳಬೇಕು. ಪ್ರಾರಂಭದಲ್ಲಿ ಟೈಮ್ ಟೇಬಲ್ ಪಾಲನೆ ಮಾಡದೇ ಹೋಗಬಹುದು. ಆದರೆ, ನೀವು ನಿರಂತರವಾಗಿ ಪಾಲನೆ ಮಾಡಿದಂತೆ ರೂಢಿಯಾಗುತ್ತದೆ. ಟೈಮ್ ಟೇಬಲ್ ಇಲ್ಲದಿದ್ದರೆ, ಒಂದು ವಿಷಯ ಹೆಚ್ಚು ಓದುತ್ತೀರಿ, ಇನ್ನೊಂದು ವಿಷಯ ಕಡಿಮೆ ಓದುತ್ತೀರಿ. ನಾನು ಮಾಡೇ ಮಾಡ್ತೀನಿ ಎಂಬ ವಿಶ್ವಾಸ ಇಟ್ಟುಕೊಳ್ಳಬೇಕು. ಯಾವುದೇ ಕಾರಣಕ್ಕೂ ನಿಮ್ಮ ಮೇಲಿನ ನಂಬಿಕೆಯನ್ನು ಹಾಗೂ ಆತ್ಮವಿಶ್ವಾಸವನ್ನು ಕಳೆದುಕೊಳ್ಳಬೇಡಿ.

ಸಮಯದ ವಲಯಗಳ ಪರಿಚಯ

 AST = Atlantic Standard Time

AHD = Alaska-Hawaii  Daylight

AHS = Alaska – Hawaii Standard

BLT = Baghdad Local Time

BST = British Summer Time

CAT = Central Alaska Time

CCT = China Coast Time

CDT = Central Daylight Time

CET = Central European Time

CST = Central Standard Time

EAD = East Australian Daylight

EDT = Eastern Daylight Time

EAS = East Australian Standard

EET = Eastern European Time

EMT = East Mediterranean

EST = Eastern Standard Time

GMT = Greenwich Mean Time

HST = Hawaii Standard Time

IST = Indian Standard Time

JST = Japanese Standard Time

MDT = Mountain Daylight Time

MET = Middle European Time

MST = Mountain Standard Time

MTS = Moscow Time Standard

MTD = Moscow Time Daylight

NZT = New Zealand Time

PST = Pakistan Standard Time

WAS = West Australian Standard

WAT = West Africa Time